COTABATO CITY -- Impas ang usa ka terorista sa engkuwentro tali sa mga sundalo alas 7:00 sa gabii, Lunes, Abril 24, sa utlanan sa Saydona Mustapha ug Mamasapano sa probinsiya sa Maguindanao del Sur.
Giila ang napatay nga si Datu Imoc Guibo, bomb maker ug courier sa Bangsamoro Islamic Freedom Fighters (BIFF).
Gibutyag ni Army's 33rd Infantry Battalion acting Commander Lieutenant Colonel Udgie Villan nga nagpahigayon sila og law enforcement operation sa Shariff Saydona Mustapha sa utlanan sa Mamasapano sa maong probinsiya.
Apan pasulod pa lang ang mga sundalo sa gitagoan ni Guibo, gipabuthan na sila sa mga sakop niini hinungdan nga nahitabo ang tunga sa oras ang sinukliay og mga bala.
Miatras ang mga terorista paingon sa Liguasan Delta nga gibiyaan ang patay nga lawas sa bomb expert.
Narekober sa posisyon ni Guibo ang usa ka kalibre .45 nga pistola, mga bala, magasin ug usa ka improvised explosive device.
Padayon ang pursuit operation sa Joint Task Force Central batok sa BIFF sa Maguindanao Del Sur.