NAGPASIDAAN ang City Social Welfare and Development Office (CSWDO) sa Dabawenyos nga di mohatag og limos ngadto sa mga tigpalimos subay sa Presidential Decree Number 1563, labing nailhan isip Anti-Mendicancy Law of 1978.
Sa paghinabi sa tigbalita kang CSWDO Head Julie Dayaday, gikanayon niini niadtong Biyernes, Oktubre 6, 2023, sa City Hall Drive, nga ang paghatag og limos ngadto sa kabataan ug kababayen-an sa kadalanan dunay bugti nga mga risgo. Dugang pa niini nga kinahanglan nga ipahinumdom sa Dabawenyos nga gidili kini ug positibo siya nga motuman sa balaod kay nagtuo siya nga ang Dabawenyos disiplinado.
“Ang amoa mangayo mi og tabang sa public nga manghatag og limos didto sa kalsada ug kanang magsakay sa jeep,” panawagan ni Dayadat.
Gisulti niya nga dunay mas maayo pang mga paagi aron nga makatabang kanila sama pinaagi sa mga programa sa City Government of Davao, non-government organizations (NGO), ug uban pang mga kaubang mga ahensiya sa CSWDO.
Puno pa ni Dayaday nga duna gyuy panginahanglan sa pagtabang sa pipila ka mga tigpalimos aron nga masupisyente sa kaugalingon, ilabi na kadtong lig-on pa og lawas ug duna pay kapasidad nga motrabaho.
“Some of our beggars naa man na silay kakayahan, kaya lang mas dali man jud ang kuwarta sa dalan. Mao nang kung naa gyud manghatag naa jud magpabilin,” pagtin-aw ni Dayaday.
Gipaklaro ni Dayaday nga kasagaran sa mga Indigenous Peoples (IPs) o lumad nga makita sa kadalanan gikan sa Talaingod, Kapalong, ug Davao del Sur.
Iyang gipahimug-atan nga komunidad sa mga lumad dinhi sa Davao City nakahibawo ug disiplinado ug ang Indigenous Peoples Mandatory Representatives (IPMRs) kanunay nagsulti kanila nga di makilimos sa dalan.
Nakigkumboya ang CSWDO uban ang DSWD aron nga tabangan kining mga lumad nga dili molupyo sa Davao City aron nga mapugngan sila sa pagpakilimos sa kadalanan ug mahatagan og gikinahanglan nga tabang.
Samtang gisulti ni 3rd District Councilor Wilberto Al-ag sa pakighinabi sab sa mga tigbalita, kinsa maoy tsirman sa Committee of Social Services, nga nagplano siya sa pagmugna og ordinansa sa Local Government Unit (LGU) sa Davao bahin sa nagapakilimos. Matud niya nga trabahuon nila kini una matapos ang 2023.
Si Maria Rizalina C. Calleja kinsa taga Davao City, usa sa mga indibiduwal nga nakadawat sa pampleta gikan CSWDO nagsulti ngadto sa SunStar Davao nga kanunay siyang mohatag og limos sa mga makililimos apan hunongon na niya kini human masayud nga dunay balaod batok niini.
Sa paghandom sa ika-31 anyos nga debolusyon niadtong 1992 sa CSWDO gikan sa Department of Social Welfare and Development-Davao Region (DSWD-Davao), ang buhatan nihimo og kampanya sa Anti-Mendicancy kon diin silang Dayaday ug Al-ag personal nga nagpapilit og estiker ngadto sa Public Utility Jeepneys (PUJs) ug nanghatag og mga materyal alang sa "Information, Education, and Communication (IEC)" sa mga nangagi sa San Pedro Square, kini aron sa pakigkombati sa nagdagsa nang mga kaso pagpalimos sa dakbayan ilabi na nga ang kapaskohan nagkaduol na.
Malaumon ang CSWDO nga bisan tuod kung di gyud nila mawagtang ang ideya sa pagpalimos, pinaagi sa ilang kampanya makubsan ang ihap sa mga tawo nga manghatag og limos ngadto sa mga makililimos aron nga madiskorahe ang ilang pagpalimos sa kadalanan.