HUMAN sa taas nga panahon sa mga pag-ulan, gilauman nga matagamtaman na sab ang nyutral nga kondisyon sa klima sa Marso, sumala sa Philippine Atmospheric, Geophysical and Astronomical Services Administration (Pagasa) sa Davao.
Gisulti ni chief meteorologist Lita Vinalay niadtong Pebrero 24, 2023, nga base sa pinakaulahing pagbanabana sa klima sa Pagasa, ang mga pag-ulan nga dala sa La Niña motapos na ug mahulipan sa nyutral nga kahimtang sa panahon apan mga pag-ulan ug bagyo posible pa gihapon mahitabo.
"Mag-neutral pa ta but normally in March, April or May, init ang panahon kay ang northeast monsoon o hangin amihan, ma-dissipate naman. Karon ang hangin amihan hinay na," tug-an ni Vinalay atol sa paghinabi kaniya uban sa Davao City Disaster Radio.
Ang La Niña nagpadayon sukad pa niadtong 2021 nga maoy hinungdan sa taas nga mga pag-ulan bisan atol sa giingong mga bulan sa ting-init. Apan tungod kay nabanabana nga moabot na sa mga mosunod nga bulan ang nyutral nga panahon, sumala ni Vinalay nga mas init nga temperatura ang mopatigbabaw.
Posible sab nga ang mas uga nga El Niño nga panahon mahitabo karong tuiga, Hunyo o Hulyo.
Apan ang sinugdan sa El Niño di pa hingpit ug ang Pagasa nagmonitor pa sa panahon kung kini mamugna ba gyud.
Matud ni Vinalay nga mopagawas sila og abiso nga mas sayo aron nga makapangandam ang publiko. (ICM)