GIINGONG wala nakatumar sa iyang tambal ang 31-anyos nga lalaki kinsa gisakyan ang ambulansya sa lokal nga panggamhanan sa Bansalan ug gipagukod ang mga pulis gikan sa Southern Philippines Medical Center (SPMC) padung sa Panabo City niadtong Dominggo, Agosto 15.
Subay sa impormasyon nga nakalap sa Superbalita Davao, gisaysay sa kapuyo sa lalaki nga na-diagnose nga dunay Bipolar Disorder ang lalaki busa gidala nila kini sa SPMC human nga nag-maoy sa ilang balay diin nasamad ang iyang tuo nga mata ug baba.
Una niini, dihang nagpakanaug og pasyente ang ambulansya, kalit misakay ang maong lalaki dihang mikanaug ang drayber niini nga nakaandar ang makina.
Nag-ekis-ekis sa pagdagan ang ambulansya labi pa kay gigukod na kini sa kapulisan sa Buhangin.
Sa ginukdanay, naabot pa ang ambulansya sa Panabo City diin nahunong lang kini dihang nakapabuto na ang kapulisan padung sa ambulansya nga maoy hinungdan sa pagkahulog sa sakyanan sa lawom nga bahin ug naigo ang lalaki sa dughan.
Hinuon, anaa na sa luwas nga kahimtang ang maong lalaki kinsa nakapamulong pa kini dihang gibalik na sa SPMC nga "Ako ang Ginoong Mangluluwas ug walay kamatayon."
Nasayran nga niadtong Agosto 9, 2021 lang nakagawas ang suspek gikan sa Southern Philippines Medical Center-Institute of Psychiatry and Behavioral Medicine (SPMC-IPBM).
Sa kasamtangan, gitun-an pa sa kapulisan ang posible nga kaso batok sa suspek nga magdepende sa resulta nga ihatag sa SPMC-IPBM.
Kung mogula nga nalisoan gikan sa maayong pangisip ang suspek, hayan nga wala kini legal nga tulubagon ngadto sa balaod.