MAGSAYSAY, Davao del Sur - Gipasidan-an sa kapolisan ang mga motorista sa ilang lugar nga motuman sa balaod trapiko bisan sa pagpatuman sa general community quarantine (GCQ).
Gibutyag ni Major Jeffmar Tercero, hepe sa Magsaysay Municipal Police Station, nga gikinahanglan nga magsul-ob og helmet ang mga motorista nga mobyahe sa lugar aron dili madakpan.
Si Tercero nagklaro nga makaagi na sa ilang checkpoint sa Barangay Barayong ang mga nanarbaho sa laing lugar apan kinahanglan nga magpakita og company identification cards.
Gawas sa helmet, gi-obliga ang tanan nga magsul-ob og face mask, ang mga motorista kinahanglan aduna’y jacket, naka-pantalon ug naka-sapatos.
Samtang, dako ang pasalamat sa mga frontliners sa lugar human ang 969 ka mga barangay frontliners ug barangay tanod sa 22 ka mga barangay, nakadawat og mga food packs gikan sa National Grid Corporation of the Philippines (NGCP) pinaagi ni Senador Christopher "Bong" Go, niadtong Byernes, Mayo 1.
Di matukib ang ilang kalipay human nga apil silang napasidunggan ning panahon sa coronavirus pandemic ilabi pa nga sila maoy nagabantay sa mga entrance ug exit point sa lugar.
Hugot ang kampanya sa lokal nga gobyerno nga di sila masudlan sa maong kagaw ilabi pa nga pulos zero ang ilang suspected, probable ug confirmed hangtud Mayo 2.
Hinuon, aduna’y 25 ka indibidwal ang padayong gipailawom sa home quarantine, 724 ang cleared na, 15 ang wala sa lugar ug aduna na’y usa sa ilang border isolation facility. (Orlando B. Dinoy)