WALA giwala sa kapulisan sa Digos City police ang anggulo nga kalambigitan sa trabaho ug personal nga bangi ang hinungdan sa pagpusil-patay sa usa ka welder.
Nahitabo ang insidente alas 11:40 sa buntag niadtong Dominggo, Marso 6, 2022, didto sa Barangay Zone 1.
Sumala ni Digos City police station commander Police Lieutenant Colonel Hamlet Lerios, ang biktima usa ka welder mechanist sa Korosh Keyka International Corporation sa Davao City nga si Jedgarry Masamayor.
Sa inisyal nga imbestigasyon sa Digos police, samtang naglakaw ang biktima sa maong lugar, gisundan kini sa usa ka wa mailhing lalaki dayon gipusil sa makadaghang higayon nga maoy hinungdan sa kamatayon niini.
Padayon ang gihimong imbestigasyon sa Digos police labot sa kremin.