Bana gipatay sa asawa

Bana gipatay sa asawa
Malalang Municipal Police Station

NIRESULTA sa duguong hitabo ang lalis sa magtiayon sa Purok 6, Barangay Tagansule, Malalag, Davao del Sur, Hunyo 11, 2024.

Sa wa masayring hinungdan ug posibleng sa tumang kalagot nga gibati sa suspek nga si alyas Gene human gidapatan, nadunggaban-patay niini ang iyang bana nga si Bernabe Tangug Cañedo, 48-anyos.

Subay sa report sa Malalag Municipal Police Station, nasayran nga nakadawat sila og tawag gikan sa usa ka pulis sa Rehiyon 12 nga nakabase sa boarder control point sa Sitio Baluyan, Barangay Bolton, Malalag, nga nagtaho nga dunay usa ka babaye nga nisurender kanila.

Daling girespondehan sa Malalag MPS ug nakita si alyas Gene.

Saysay sa suspek ngadto sa pulis nga nag-away sila sa iyang bana, nga niresulta sa pagpamukbok kaniya.

Wa kaantus ang ginang, hinungdan nga gidunggab niini ang bana hinungdan sa iyang kamatayon.

Human sa hitabo, dali siyang nisibat apan tungod paghasol sa iyang konsensiya, nisurender siya sa pulis.

Sa pagsuwat ning balita, ang suspek naa na sa kustodiya sa Malalag Municipal Police Station samtang naghuwat sa kasong atubangon niini ngadto sa korte. (Rhona Goc-ong-Villariasa)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph