DUHA ka drayber ang nasamdan human nagbangga ang ilang mga sakyanan sa Coastal Road, Davao City Martes sa hapon, Hulyo 29, 2025.
Alas 4:26 sa hapon, nadawat sa kapulisan ang report gikan sa City Transport and Traffic Management Office (CTTMO) bahin sa aksidente nga nahitabo.
Ang insidente naglambigit sa Mitsubishi L300 van ug gimaneho ni alyas Samuel, 47-anyos, residente sa St. Michael Village, Barangay Maa.
Ang laing sakyanan mao ang sports utility vehicle (SUV) nga Mitsubishi Montero ug gimaneho ni alyas Irene, 40-anyos, taga South Pacific, Catalunan Pequeño.
Base sa inisyal nga imbestigasyon, ang van gikan sa Punta Dumalag samtang ang SUV padulong gikan sa Talomo Cemento.
Pagsugat nila sa lugar sa nahitaboan, nasangit matud pa ang tuong atubangan nga ligid sa SUV sa konkreto nga gutter, hinungdan nga nawagtangan og kontrol ang drayber ug nisulod kini sa pikas linya hinungdan nga nisungag ang SUV sa van.
Tungod sa kusog nga impak, nituyok ang van, samtang ang SUV nipadayon og bangga sa konkreto nga kural sa daplin sa dalan.
Ang duha ka drayber nakahiagom og mga samad ug gihatagan dayon og first aid sa Central 911 paramedics sa lugar. Human niini, gidala sila ngadto sa Southern Philippines Medical Center (SPMC) alang sa dugang medikasyon.
Samtang ang duha ka mga sakyanan gidala sab sa awtoridad alang sa saktong disposisyon samtang padayon pa ang imbestigasyon sa insidente. (Jeepy P. Compio)