COTABATO CITY - Gibarugan ni Bangsamoro Chief Minister Ahod Murad Ebrahim nga nagpabilin ang iyang pasalig sa Comprehensive Agreement on the Bangsamoro (CAB) taliwala sa mga plano alang sa pagbulag sa Mindanao gikan sa Republika sa Pilipinas.
Matud ni Ebrahim nga ang Bangsamoro Government mosunod sa mga probisyon sa CAB kalabot sa katungod sa kaugalingong paghukom.
Gidugang niini nga ang Bangsamoro Government mosunod sa saad ug mandato niini nga nalatid sa Bangsamoro Organic Law (BOL) ug dili manghilabot sa isyu sa pagbulag sa Mindanao gikan sa Gobyerno sa Pilipinas.
Dugang pa ni Ebrahim, nga hinungdan lamang kini sa kalibog, kabalaka ug pangutana sa mga lungsuranon sa BARMM busa angayan nga mohatag og opisyal nga pamahayag.
Giawhag usab ni Ebrahim ang tanan nga suportahan ang kasamtangang administrasyon ngadto sa pagmintina ug pagpalambo sa kalinaw, hustisya, ug seguridad sa tibuok BARMM.
Sa bulag nga pahayag, ang Bangsamoro Transition Authority Interim member of Parliament Atty. Teng Ambolodto miingon nga layo na ang naabot sa BARMM tungod sa panaghiusa ug suporta ni Pangulong Ferdinand Marcos Jr.
Siya miingon nga dili kini ang panahon sa pagbahinbahin.
Gidugang niya ang damgo sa Presidente mao usab ang damgo sa Bangsamoro, busa iyang gitinguha ang panaghiusa padulong sa Bag-ong Pilipinas ug Bag-ong Bangsamoro.