Bankerohan bantayan og 24-oras sa CTTMO

Bankerohan bantayan og 24-oras sa CTTMO
City Information Office-Davao

ARON maseguro nga magpabilin ang kahapsay sa mga vendors sa Bankerohan Public Market sa Davao City, ang City Transport and Traffic Management Office ug ang Ancillary Services Unit, sa pakigtambayayong sa mga awtoridad sa barangay, nagpahigayon og round-the-clock monitoring human sa pagpatuman sugod Hunyo 1 sa sidewalk ratio ubos sa bag-ong traffic scheme.

Ubos sa 1/3, 2/3 sidewalk ratio, ang mga sidewalk vendors gihatagan sa ikatulo nga bahin sa sidewalk isip display area sa ilang mga baligya samtang ang nahabilin nga 2/3 gigahin alang sa mga pedestrian.

"Gihimo gyud ni diri ang pag-detail namo 24/7 sa Bankerohan para mabantayan gyud ang mga vendors," ingon ni Reymar Bayato, usa ka Traffic Enforcer nga gidestino sa Datu Bago Street sa Bankerohan.

Niadtong Lunes, wala na mag-okupar ang mga vendor sa dakong bahin sa kadalanan sa Bankerohan kay gisunod ang 1/, 2/3 policy.

Matud ni Bayato nga sa ikatulong adlaw sa bag-ong traffic scheme ilang gihawiran ang mga 95 porsiyento sa mga lugar sa Bankerohan. Matud niya duna pay mga malapason apan pipila ra.

Iyang gipahinumdoman ang mga vendors nga sundon ang maong patakaran ug gitambagan usab ang mga motorista sa lugar nga basahon ang traffic signs.

"Pahinumdom lang sa vendors tuloy-tuloy naman ang atong progress diri nga ingon ani ni siya hangtud sa hangtud. Unta maminaw na sila unya dili na sila mag-extend og lamesa kay kung buhaton nila ma- demolish man gihapon sila," ingon ni Bayato.

Sa bahin ni Maridelma Boco, vendor nga nibalhin gikan sa Posadas St., paingon sa bag-ong dapit sa ikaduhang andana sa fish section, sa pakighinabi sa City Information Office niadtong Lunes nga mo-adjust sila sa bag-ong lugar tungod kay usa kini ka designated place nga gihatag alang kanila.

"Wala pa man nuon mi kasugod pero tan-awon lang try lang namo, kami tanan dinhi nga mga vendors sa Posadas nagtuman lang gyud mi sa balaod, wala man mi mahimo kay gobyerno man nagbutang sa amoa, gobyerno man ang nagbutang sa amoa dinhi, pasalamat pud mi," ingon ni Boco.

Gihimo kini sa lokal nga kagamhanan sa siyudad sa Davao aron masulbad ang problema sa trapiko sa Bankerohan Public Market ug kahatagan og patas ang mga naninda sa sulod nga bahin sa maong merkado publiko. (Jeep P. Compio/CIO)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph