Barbero gidunggab tungod sa selos

SELOS ang hinungdan sa pagpangdunggab nga nahitabo sa pampublikong palengke sa Purok 5, San Jose, Poblacion, Montevista alas 5:38 sa hapon, Hulyo 13, 2024.

Kini maoy nigawas nga resulta sa gihimong imbestigasyon sa Montevista Municipal Police Station kinsa nag-ila sa biktima nga si Romeo D. Balalio, 58-anyos, minyo, barbero, molupyo sa Purok 5, Brgy. Tapia, Montevista.

Gibutyag nga ang biktima giluba sa suspek nga si Wilfredo Natal Narvasa, 58-anyos, dunay kapuyo, tigluto nga taga Purok 1, Brgy. Camantangan, Montevista.

Base sa inisyal nga imbestigasyon, giingong nagselos ang suspek ngadto sa biktima sanglit nagduda kini nga ang biktima ug ang iyang kapuyo adunay relasyon.

Gamit sa suspek sa pagdunggab mao ang kutsilyo ug maayong pagkaigo sa biktima sa usa ka tudlo niini sa tuong bahin sa kamot ug sa tuong abaga.

Hinuon ang biktima nakahimo pagdagan palayo samtang suspek nasikop sa mga pulis ug narekober gikan kaniya ang kutsilyo nga gigamit sa pagdunggab.

Naa na karon sa kustodiya sa Montevista MPS ang suspek samtang gihikay ang tukmang kasong ipahamtang batok kaniya. (Dexter T. Visitacion)