Batang gikulata sa amahan patay na

Batang gikulata sa amahan patay na
Pinaambit nga hulagway

NAGBANGOTAN ang pamilya ug mga kabanay sa 8-anyos nga gikulata sa iyang amahan human nga namatay kini alas 3:00 sa kaadlawon, Huwebes, Enero 25, 2024, sa General Santos City.

Ang biktima usa ka Grade-2 student ug nagpuyo sa Purok Templado, Barangay Fatima, General Santos City.

Kahinumdoman nga gidabu-dabuhan sa pagkulata sa hubog nga amahan ang anak nga si alyas Yurie nga wala daw mituman sa iyang gisugo.

Wala pa matagbaw ang suspek, iyang gihakwat ang bata ug gibundak sa yuta.

Daling gitabang sa mga paryente ug silingan ang bata diin gidala siya ngadto sa balay tambalanan.

Sa pagsusi sa mga doktor, nalata ang ulo sa bata, bali ang mga abaga ug bukog sa likod. Gawas pa niini, duna say pinaakan sa tiil ang biktima nga maoy hinungdan sa iyang kamatayon.

Nakauli na ang inahan sa biktima nga si alyas Joy gikan sa Manila nga mo-abroad unta sa Middle East apan wala mahinayon gumikan sa nahitabo.

Sobra nga pagmahay sa amahan nga si alyas Roy sa kamatayon sa iyang anak nga gikulata niini sa dihang hubog siya.

Gibalhog na sa prisohan ang suspek ug gihulat na lang ang mando sa korte bahin sa gipasakang kaso batok kaniya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph