PASAKAAN og kasong kalapasan sa Republic Act 9165 o Comprehensive Dangerous Drug Act of 2002 ang bigtime drug pusher nga nadakpan alas 4:00 sa kaadlawon, Huwebes, Enero 11 sa Matalam, Cotabato Province.
Giila ang suspek nga si Jonnel Valdez Tipas alyas Jun, 32, minyo ug nagpuyo sa Barangay Poblacion, Datu Piang, Maguindanao del Sur.
Gibutyag ni Cotabato Police Provincial Office Director Colonel Harold Ramos nga nagpahigayon og drug buy-bust operation ang mga sakop sa Regional Philippine Drug Enforcement Unit (RPDEU) ug Matalam Municipal Police Station sa Barangay Kilada, Matalam.
Sa dihang itunol na sa suspek ang shabu ngadto sa asset sa RPDEU, gilayon siyang gisignit.
Narekober sa posisyon ni Tipas ang dagkong pakite sa shabu nga nagkantidad og P715,000 base sa drug market value.
Ang suspek usa ka high value target nga bigtime drug pusher nga dugay na nga gipanid-an sa mga awtoridad.
Balhog na ang suspek sa prisoihan sa Matalam Municipal Police Station ug naghuwat sa pormal nga pagpasaka sa kaso batok kaniya.