GIDASIG ni 1st District Congressman Paolo “Pulong” Duterte ang mga biktima sa New People’s Army ug mga adik sa druga nga motingog ug ipakita ang suporta ngadto kang kanhi Presidente Rodrigo Duterte.
“Bilang suporta sa paninindigan ni dating Pangulong Rodrigo Roa Duterte, hinihikayat ko ang bawat Pilipinong biktima ng mga teroristang NPA at mga adik na magsalita,” awhag niya nga pahayag niadtong Lunes, Hunyo 9, 2025.
Matud ni Paolo nga mga biktima sa NPAs ug drugista motingog ug iyagyag ang pagpanglimbong sa mga kriminal ug rebeldeng grupo nga padayong nagdaut sa komunidad.
Iyang gitin-aw nga ang NPA usa ka teroristang organisasyon ug dili sila ang mga biktima. Sila ang rason nganong liboan ka mga Pilipino, sundalo man, pulis, magtutudlo, mag-uuma ug mga batan-ong henerasyon, nawad-an sa ilang kinabuhi, balay, ug kaugmaon.
Matud ni Paolo nga inay makig-away alang sa kalinaw, mga rebeldeng grupo nagdala og kasamok, kahadlok, ug pagpangilkil ngadto sa mga komunidad.
Gawas sa ilang kampanya batok sa ilegal nga druga, ang away batok sa NPA mao ang kombati alang sa kaugmaon sa taliabot nga henerasyon ug seguridad sa Pilipinas.
“Makakaasa kayong kami ay handang makinig, magprotekta, at kumilos. Sama-sama nating ipaglaban ang isang Pilipinas na malaya sa droga, takot, at terorismo,”pasalig niya.
Iyang gipadayag nga ang mga istorya sa mga biktima maoy mahinungdanon ug sila maoy tinuod nga tingog sa katawhan. Kinahanglan mga tawo di magtugot sa mga terorista nga tuison ang pagsalig. Dugang niya nga ang maong away di tahas sa usa ka indibiduwal, inay away sa matag Pilipino kinsa gusto og kalinaw ug hustisya.
Kahinumdoman, usa ka video nga gialegar nga nagpakita sa pagpangatake ni Paulo sa usa ka lalaki sa bar niadtong Pebrero 23, 2025.
Ang kaso gipasaka na sa Department of Justice (DOJ).
Niadtong Mayo 4, gitin-aw sa Philippine National Police nga wala sila nalambigit sa nagreklamo ug ang affidavit di gikan sa bisan kinsa sa ilang personahe o yunit. (Rojean Grace G. Patumbon)