WA NA'Y sulod nga lamang-loob ang tiyan sa baka nga nadiskubreng patay sa alas 6:00 sa buntag, Huwebes, Hulyo 17, 2025, sa Kidapawan City.
Matud ni Jeanafe Igot nga molupyo sa Barangay Mua-an, Kidapawan City nga samtang naghatud siya sa iyang anak nga mo-eskuwela, iyang naagian ang binuhing baka nga patay na.
Sa dihang gisusi, nasayran nga nahurot na og kawala ang tibuok sulod sa tiyan ug nakuniskunis na.
Dali niyang gitaho ang insidente ngdto sa mga opisyales sa Barangay Mua-an ug sa mga sakop sa Barangay Peacekeeping Action Team (BPAT).
Daghan ang nagtuo nga posibleng dunay mangtas nga mananap ang nagpatay sa baka ug gikaon ang mga lamang-loob niini.
Duda sab ang mga opisyales sa barangay nga ang pagbalbal sa tiyan sa baka, hinimoan lang sa mga tawo.
Giimbestigahan na sa kapulisan sa Kidapawan City Police Station ang insidente.
Sa pikas bahin, bangi sa trabaho ang gilantaw nga motibo sa mga awtoridad sa pagpamanhig-patay sa municipal engineer alas 7:00 sa gabii, Miyerkules, Hulyo 16, 2025, sa Shariff Aguak, Maguindanao del Sur Province.
Giila ang biktima nga si Syed Ariff Malang, municipal engineer sa Shariff Saydona Mustapha samtang naluwas ang tulo niya ka mga kauban.
Matud ni Maguindanao del Sur Police Provincial Office (MDSPPO) Director, Police Colonel Sultan Salman Sapal nga sakay sa iyang pick-up ang biktima ug tulo niya ka mga kauban padulong na mopauli.
Apan pag-abot nila sa Brgy. Timbangan, Shariff Aguak sa maong probinsiya, gipamusil sila sa wala mailhing mga suspek kinsa nisibat gilayon human mahimo ang ilang tuyo.
Patay ang engineer human nakaangkon og daghang samad pinusilan sa lawas.
Hustisya ang gisinggit karon sa pamilya, mga kauban ug higala sa biktima.
Samtang gihugtan na sab sa Shariff Aguak Municipal Police Station ang imbestigasyon sa pagpatay sa municipal engineer. (Edgar E. Fuerzas)