KIDAPAWAN CITY — Si Kidapawan Bishop Bagaforo, niawhag sa mga lider sa gobyerno nga mokooperar sa imbestigasyon sa International Criminal Court (ICC) kalabot sa extra-judicial killings.
"Ang hingpit nga kooperasyon dili timaan sa kahuyang, apan pagpakita sa atong pasalig sa pagmando sa balaod ug sa Katawhang Pilipino.”
Mao kini ang pamahayag ni Kidapawan Bishop Jose Colin Bagaforo, DD kinsa mao usab ang presidente sa Caritas Philippines.
Kini nagtumong sa alegasyong kapintasan, o krimen nga nahitabo sa administrasyon ni kanhi Presidente Rodrigo Duterte.
Ug kung mapamatud-an nga adunay mga krimen, labi na sa extra-judicial killings, kinahanglan nga mahatagan og hustisya ang mga biktima ug kinahanglan nga mogawas ang kamatuoran.
Ang ICC maoy usa ka permanenteng internasyonal nga korte nga gitukod aron sa pag-imbestiga, pag-prosecute o pagkiha ug paghusay sa mga indibidwal nga giakusahan nga nakahimo sa labing seryoso nga mga krimen nga gikabalak-an sa internasyonal nga komunidad.
Sa kinatibuk-an, mao ang krimen sa Genocide, mga krimen batok sa katawhan, mga krimen sa gubat.
Una na nga giluhatan ni Presidente Ferdinand Marcos Jr., nga walay hurisdiksyon ang ICC sa nasud.