Biyuda nakit-ang patay sa kulongan sa kanding

PADAYON pang gisubay sa kapulisan sa Maco Municipal Police Station ang nakaplagang patay sa 64-anyos nga babaye nga nagbuy-od sa kulongan sa kanding sa Purok 5, Dumlan, Maco alas 9:30 sa gabii, Sabado, Agusto 25, 2024.

Ang biktima giila nga si Rosalia Caban Bertudazo, biyuda ug molupyo sa nahisgutang dapit.

Gibutyag nga ang biktima nag-estar kauban sa iyang kapuyo nga si Tito Bansig Suelto, Jr., kung diin niadtong higayona samtang atua ang biktima sa kulongan sa ilang kanding giingon nga aduna’y insidente sa pagpamusil nga gikamatay sa biktima.

Matud pa nga ang biktima miadto sa kulongan sa ilang kanding nga dunay gilay-on nga 20 metros gikan sa ilang balay apan sumala pa nadungog ni Suelto, Jr., ang buto sa pusil hinungdan nga iyang gitawag ang biktima apan wala kini mitubag busa nanawag og tabang ang kapuyo.

Giingon nga sa pag-abot sa mga silingan sa dapit, nakaplagan ang patay’ng lawas sa biktima nga nagbuy-od sa yuta ug nakahiagom kini og samad pinusilan sa lawas.

Sa paghagpat ning balita, padayon pang gisusi sa mga pulis ang misteryong nagpaluyo sa kamatayon sa biktima lakip ang matuod nga responsable sa kamatayon niini. (Dexter T. Visitacion)