TALIWALA sa mga hagit nga resulta sa hugaw nga pamulitika, ang gihunahuna gihapon sa inyong Manong Pulong mao ang pagpangalagad sa atong isig-ka-tawo nga Dabawenyo.
Bag-ohay lang, ang atong 1st Congressional District Office sa Davao mipanguna sa usa ka dakong bloodletting drive. Kauban ni Manong Pulong, ang mga barangay health workers (BHWs) sa siyudad, ug ang Southern Philippines Medical Center (SPMC) sa maong proyekto.
Kung aduna kamoy paryente o higala nga nadala sa emergency room ug nanginahanglan dayon og dugo, nasayod kamo kung unsa ka-importante ang adunay nakapundo nga dugo alang sa ingon niini nga mga emerhensiya.
Busa, dako ang pasalamat ni Manong Pulong sa tanang nag-donate sa dugo atol sa bloodletting activity nga gipahigayon sa Davao City Recreation Center niadtong Pebrero 6.
Nakakolekta ang SPMC og 159 ka bag sa dugo gikan sa kapin sa 500 ka tawo nga mipartisipar sa bloodletting drive.
Ang anak ni Manong Pulong nga si Rigo mitabang aron mahimong malampuson ang maong aktibidad.
Ang bloodletting activity gitumong alang sa atong mga kabus nga pasyente nga lisod makakuha og dugo sa dihang gikinahanglan, tungod kay nagkinahanglan pa kini og bayad. Nasayod kita nga bisan ang dugo dunay kantidad kung ang usa ka pasyente ma-ospital ug manginahanglan og blood transfusion.
Sumala sa presidente sa BHWs sa Barangay Catalunan Grande nga si Carlita Bontog, ang pagpundo og dugo nagseguro nga dali makaresponde ang mga ospital sa trauma cases. Sa ingon, mas dako ang kahigayunan nga maluwas ang mga pasyenteng nanginahanglan og emergency treatment.
Matud usab ni SPMC blood donor recruitment officer Janson Cajegas, ang dugo adunay kinabuhi nga 35 ka adlaw lang, busa kinahanglan ang regular nga donasyon aron maseguro nga dunay igo nga suplay sa mga blood bank.
Tungod niini, plano ni Manong Pulong nga ipadayon ang bloodletting drive aron matabangan ang atong mga kabus nga kaigsuonan, labi na sa Davao.
Sa wala pa ang bloodletting drive, ang inyong Manong Pulong nag-organisar usab og medical mission uban sa Derm Edge ug Manic Nightnings Events Production.
Kapin sa 700 ka Dabawenyo ang nakapahimulos sa medical mission nga gipahigayon sa Barangay 76-A Bucana. Libre ang konsultasyon sa doktor, resita sa tambal, eye exam, ug pagpanghatag og reading glasses.
Daghan usab ang nakapahimulos sa minor surgeries ug tambal alang sa ilang mga problema sa panit.
Si Rigo ug ang iyang kapikas nga si Yssa mitabang sa pag-organisar sa maong medical mission. Isip mga tinugyanan ni Manong Pulong, sila ang nanguna sa pagpanghatag og food packs ug meryenda sa mga nakilahok sa medical mission.
Adunay libre nga ice cream ug doughnuts aron dili magutman ang mga Dabawenyong mipila sa maong adlaw.
Daghang salamat sa atong mga barangay health workers, mga doktor, nars, dentista, ug uban pang medical personnel, sa tanang volunteers, ug sa tanang nag-organisar ug misuporta aron mahimong malampuson ang atong bloodletting drive ug medical mission.
Magpabilin kamo nga masaligan nga sa serbisyong Tatak Duterte, ang tinuod ug matinud-anong pagpangalagad ang kanunay nga atong unahon, bisan pa sa mga babag ug mga nagtinguha nga mopugong sa atong padayon nga pagsilbi sa katawhan. (PR)