GITAAS sa City Disaster Risk Reduction and Management Office (CDRRMO) ang "blue alert" isip preparasyon alang sa 2025 National and Local Elections (NLE).
Gisulti sa CDRRMO nga subay sa 2025 NLE, ilang gipahugtan ang ilang emergency preparedness measures aron pagsiguro sa kaluwasan ug seguridad sa publiko tungod sa nagkataas nga lihok sa mga tawo, daghang mga politikal nga kalihukan, ug potensiyal nga risgo sa "civil disturbances" o "natural hazards."
Ang blue alert status nagseguro nga ang andam ang response units ug naka-estambay, ug dunay maayong koordinasyon nga paningkamot ug padayong monitoring sa kahimtang.
Ang pagdaghan sa mga rali nga politikal ug kampanya sa nagkadaiyang pampublikong lugar gilauman usab.
“The elevation to blue alert primarily aims to prepare for any potential incidents that may occur throughout these events, necessitating immediate emergency medical response,” butyag sa CDRRMO sa ilang Facebook post, Mayo 5, 2025.
Gipahimug-atan sa buhatan ang kaimportante sa "proactive" kaandam sa kalamidad ug epektibo nga mga pamaagi sa pagtubag, lakip na ang resource augmentation.
Matud nila nga ang emergency resources ipakatag aron pagseguro nga luwas ug gibantayan nga mga kalihukan alang sa proteksiyon sa publiko.
Kung ang blue alert status gipalihok, ang DCDRRMO Emergency Operations Center (EOC) palihukon sab aron pagseguro sa koordinasyon sa tanang paningkamot, padayong pagmonitor sa sitwasiyon, ug implementasyon sa safety and security measures sa tibuok kalihukan.
Gitakda ang 2025 NLE sa Mayo 12, 2025. Sa maong adlaw, daghang mga Pilipino gilauman nga mobotar sa mga presinto nga botohanan sa ilang mga lugar.
Kahinumdoman, nihimo og send-off ceremony ang Davao City Police Office (DCPO) niadtong Mayo 2, 2025, sa Camp Capt. Domingo Leonor sa San Pedro, Davao City alang sa mga pulis nga ipakatag atol sa eleksiyon.
Gipahayag ni DCPO chief, Police Colonel Hansel Marantan, niadtong April 24 nga mga 5,000 safety ug security personnel ang ipakatag alang sa tibuok panahon sa eleksiyon. (Rojean Grace G. Patumbon)