GIISA sa City Disaster Risk Reduction and Management Office (CDRRMO) ang "blue alert status" pagpangandam alang sa Kadayawan Festival 2025.
Matud sa CDRMMO nga ilang gipalihok ang ilang Emergency Operations Center (EDC) ug nipataas sa Blue Alert status. Kini aron nga maseguro ang gipakusgan nga emergency preparedness measure alang sa kaluwasan sa publiko ug seguridad kon diin gikonsidera nga dunay pagtaas sa "foot traffic" sa dakbayan ug potensiyal nga mga risgo sa "civil disturbances and natural hazards".
Dugang sa buhatan nga uban ang alert status dunay pagpakatag sa emergency resources ug han-ayon aron nga makagarantiya nga dunay luwas ug seguridad sa selebrasyon ug pagtaas sa public security.
"In line with this, Davao City Risk Reduction and Management Operations Center (DCDRRMOC) shall adopt the alert level status to Blue throughout the 2025 Kadayawan Festival celebration from August 7-31, 2025," matud sa CDRMMO, Martes, Agosto 5, 2025.
Ang pagpataas sa alert status nahisubay sa SP Resolution No. 02395-24, kon diin nahiunod niini nga ang emergency condition sa CDRRMOC alert nga kahimtang ideklara kung ang "hazard" masusi nga magbaton og impak o epekto ngadto sa kinabuhi ug gikinahanglan og koordinasyon sa pagtunol og emergency assistance o suporta gikan sa hingtungdan nga mga ahensiya sa gobyerno.
Ang Kadayawan Festival mao ang tinuig nga pangilin nga gisaulog sa Davao City nga naghandom sa madagayaon nga ani. Sugdan ang pangilin uban ang Kadayawan 2025 Misa Pasasalamat sa San Pedro Cathedral sa Agosto 7, gisundan sa Pag-Abli sa Kadayawan sa Agosto 8 sa Kadayawan Tribal Village sa Magsaysay Park.
Ang Kadayawan Trade Fair sa Magsaysay Park molanat gikan Agosto 8 hangtud 31. Ang Cultural Presentation sa Hiyas sa Kadayawan gitakda sa Agosto 9 sa SM City Davao.
Pananam sa Kadayawan mahitabo gikan Agosto 9 hangtud 17, samtang ang Bantawan Cultural Celebration molanat gikan Agosto 10 hangtud 12 sa Kadayawan Tribal Village sa Magsaysay Park.
Ang Kasikas sa Kadayawan sa Rizal Park gitakda sa Agosto 13, ug ang Kadayawan Expo and Food Trucks Bazaar sa likod sa Rizal–Bolton Street Extension himuon gikan Agosto 13 hangtud 17.
Ang gipaabot nga Hiyas sa Kadayawan Grand Coronation Night mahitabo sa Agosto 14 sa USeP Gymnasium. Samtang ang Agong ug Kulintangan ug Tunog ug Sayaw sa Kadayawan mahitabo sa Agosto 15 sa Rizal Park.
Dula sa Kadayawan sa People’s Park ug Konsierto Kadayawan sa San Pedro Square gitakda sa Agosto 16.
Ang Pamulak ug Indak-Indak sa Kadayawan Street Parade, gikan Roxas Avenue hangtud sa San Pedro, mahitabo sa buntag sa Agosto 17, sundan sa Indak-Indak sa Kadayawan Grand Showdown sa hapon. (Rojean Grace G. Patumbon)