MGA gituohang high-grade nga mga marijuana ug mga gituohang shabu ang nakumpiska sa National Bureau of Investigation-Southeastern Mindanao Regional Office (NBI-Semro) Davao Dominggo sa buntag, Hunyo 8, 2025, sa Barangay Cabantian, Buhangin District, Davao City.
Sumala ni NBI-Davao director Atty. Arcelito Albao nga nakadawat sila og impormasyon gikan sa usa ka impormante nga nagpahibalo nga dunay alegasyong ilegal nga aktibidad sa usa ka balay sa Barangay Cabantian.
Gilayong giporma sa NBI-Semro ang usa ka team aron ipahigayon ang ronda ug dihang nagpositibo ang impormasyon, gilayong gisulod sa NBI ang balay nga dala ang search warrant.
Giingon sa opisyal nga gituohang usa ka dakong bodega sa ilegal nga druga ang ilang nadiskubrehan gumikan sa ubay-ubay nga mga drug paraphernalias ug mga gituohang ilegal nga druga ang ilang nakumpiska.
“More than a million worth of shabu ito and other alleged ilegal drugs pero i-examine pa natin itong lahat na na-confiscate natin,” ingon ni Atty. Albao.
Nakumpiska sa NBI-Davao ang mga timbangan, liquid marijuana, ug Kush marijuana nga miagi sa proseso, dunay mga liquid marijuana nga gituohang maong itubil sa vape, exotic ug erotic liquid nga giingong sex enhancer ug pipila ka mga gamit sa ilegal nga druga.
Narekober sab sa NBI-Davao ang duha ka thermal delivery backpack sa iladong mga food delivery services aron suma pa ipahulagway nga legal ang pag-deliver sa druga ngadto sa mga parokyano.
“Also na-recover natin itong dalawang thermal delivery backpack para it would appear na legal ang trabaho nila,” dugang ni Albao.
Giingon sab ni Albao nga padayon ang ilang gihimong imbestigasyon sa hitabo sanglit walay bisan usa nga ilang nadakpan atol sa operasyon samtang gipanubayan na sab sa maong ahensiya kung si kinsa ang tag-iya sa maong balay. (Jeepy P. Compio)