COTABATO CITY -- Magpuyo nga malinawon ang tumong sa pagtahan sa usa ka giingong bomb expert sa teroristang grupo alas 2:00 sa hapon, Huwebes, Mayo 22, 2025, sa Sultan Kudarat, Maguindanao del Norte.
Giila ang suspek nga si alyas Tojan, 35 anyos, minyo ug bomb expert sa Bangsamoro Islamic Freedom Fighters (BIFF-Karialan faction).
Nisurender si alyas Tojan sa kampo sa 1st Brigade Combat Team (1BCT) sa Barangay Pigcalagan, Sultan Kudarat.
Ang terorista pormal nga gidawat ni Ist BCT Commander Brigadier General Jose Vladimir Cagara.
Gikanayon ni alyas Tojan nga boluntaryo siya nga mitahan tungod sa tumang kahadlok sa iyang kaluwasan sa gipalig-on nga operasyon sa militar batok sa mga terorista.
Dugang pa, giasoy sa kanhi terorista ang kalisod, kagutom, ug kakapoy nga nasinati samtang nagtago-tago kanunay sa kabukiran ug kalasangan.
Gitahan sa bomb expert ang usa ka Uzi 9mm submachine gun ug 60mm improvised explosive device (IED).
Nanawagan ang 6th Infantry (Kampilan) Division ug Joint Task Force Central nga gipangulohan ni Major General Donald Gumiran sa uban pang mga sakop sa armadong grupo nga mosurender ug itugyan ang ilang mga armas subay sa gihanyag nga reintegration program sa gobyerno alang sa malinawon ug malambuong kaugmaon. (Edgar E. Fuerzas)