GIANUNSYO sa Commission on Elections (Comelec) nga ang boto nga "Yes" maoy nakadaug sa bag-uhay lamang nahuman nga Special Geographic Area (SGA) Plebiscites sa Bangsamoro Region niadtong Sabado, Abril 13.
Nagpasabot nga ang 63 ka mga barangay sa SGA sa Pikit, Midsayap, Aleosan, Pigcawayan, Kabacan ug Carmen sa North Cotabato pormal nang mabulag sa ilang inahan nga lungsod ug mahimong kabahin sa bag-ong natukod nga lungsod.
Kini mao ang mga lungsod sa Pahamudin, Kadayangan, Kabalukan, Northern Kabacan, Kapalawan, Malmar, Tugunan, ug Ligawasan subay sa BTA Parliament Bill Nos. 129-136.
Sa press statement sa Comelec, sa 89,594 ka rehistradong botante sa SGA-Barmm, 58,970 ang mibotar.
Sa nasangpit maong gidaghanon sa mga botante, 38,047 ang mibotar pabor sa pag-umol sa walo ka lungsod sa SGA samtang 103 lang ang mibotar sa "No".
Niabot sa 53.27 porsiyento ang voter turn-out sumala sa Comelec. (Edgardo E. Fuerzas)