Charter change gisupak

Charter change gisupak
Gikan kang Bishop Jose Colin Bagaforo, DD

ALANG sa Caritas Philippines, ang social action arm sa Catholic Bishops' Conference of the Philippines (CBCP), angay nga hatagan og pagtagad sa gobyerno ang pagpasiugda sa mga programa sa social services, pakigbatok sa kurapsiyon ug mga programa aron matubag ang isyu sa kakabus.

Mao kini ang gipadayag ni Caritas Philippines President ug Diocese of Kidapawan Bishop Jose Colin Bagaforo, D.D.

Niingon si Bagaforo nga ang bisan unsang lakang sa pag-usab sa Konstitusyon nga walay partisipasyon sa publiko nagdala lamang og malas ug pagduda sa tinuod nga tuyo sa mga nagpasiugda niini.

Dugang pa sa obispo nga imbes mag-usik og panahon ug pundo sa pag-usab sa Konstitusyon, mas maayong itutok sa gobyerno ang panahon ug oras niini kung unsaon pagwagtang sa kurapsiyon sa gobyerno ug paghatag sa mga serbisyo nga gikinahanglan sa mga lungsuranon.

Giinsister usab sa CBCP, sumala ni Bagaforo, nga kung usbon ang Konstitusyon, angay kini mosubay sa dignidad, tawhanong katungod, kamatuoran, partisipasyon ug alang sa kaayohan sa katawhan.

Apan, matud niya, kining tanan wala mosunod sa gisugyot nga mga pagbag-o nga gipahayag sa Konstitusyon.

Si Fr. Antonio Labiao, Jr., Executive Director sa Caritas Philippines, nagkanayon angay nga ang gobyerno mopasar og mga balaod ug mohimo og mga lakang nga motubag sa mga nag-unang isyu ug problema sa nasud karon sama sa mosunod:

Una, pagpanalipod sa kinaiyahan, diin matud niya, gikinahanglan ang mas komprehensibo nga balaod sa reporma sa pagmina aron mapanalipdan ang kinaiyahan ug lokal nga komunidad. Ang Kongreso napakyas sa pagsulbad niini nga isyu sa dugay nga panahon, matud niya.

Ikaduha, ang isyu sa Anti-dynasty measures. Matud niya nga buot sa mga Pilipino ang usa ka lider nga wala gibase sa koneksiyon sa pamilya.

Ug ang ikatulo, ang electoral reforms aron mapreserba ang integridad sa eleksiyon ilabi na ang boto sa katawhan.

Sa katapusan, gipahinumdoman sa Caritas ang gobyerno sa katapusang tumong niini nga mao ang pagtuman sa 1986 EDSA Revolution.

Giingon nga buot sa mga Pilipino ang usa ka gobyerno nga unahon ang kaayohan sa iyang katawhan ug dili ang personal nga katuyoan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph