GISULTI sa City Health Office (CHO) nga gimonitor nila ang "close contacts" sa duha ka mga nakompirma nga kaso sa Monkeypox (Mpox) kinsa nasulod sa Southern Philippines Medical Center (SPMC).
Si Farah May C. Clamor, section head sa CHO City Epidemiology and Surveillance Unit (CESU), nagkanayon nga nagmonitor sila sa "close contacts" sulod sa 21 ka adlaw.
Iyang gitin-aw nga kini nga mga indibiduwal wala gikinahanglan nga ilain, apan gitambagan nga mag-obserba sa ilang kaugalingon sa bisan unsang sintomas sa Mpox.
Dugang ni Clamor nga kung motumaw ang mga sintomas, kini ang panahon nga sila ilain.
Matud niya nga mga "close contacts" mahimong magkinaugalingon nga magpalain sa balay basta ang ilang sintomas di grabe ug ang ilang balay dunay lawak para sa "isolation".
Samtang gikanayon sa Department of Health-Davao Region (DOH-Davao) nga nagpadayon ang "contact tracing", ug mga "close contacts" wala dayon gipalain.
Butyag sab ni Dr. Abdullah Dumama Jr., DOH Undersecretary ug Regional Director sa DOH-Davao, nga ilang girekomenda nga mga "close contacts" magpuyo sa balay kung nagsugod na sila makasinati og bisan unsang sintomas.
Gipasalig hinuon niini ngadto sa publiko nga ang Mpox di makamatay nga sakit. Apan mohatag kini og seryusong hulga sa kabataan, mabdos nga mga babaye, katigulangan, ug mga indibiduwal kinsa immunocompromised o dunay comorbidities.
“Ang risgo mas taas kung mamatay kung ang tao aduna nay lain-laing sakit,” pahayag niya atol sa paghinabi sa Davao City Disaster Radio (DCDR), Lunes, Abril 21, 2025.
Dugang ni Clamor nga walay espisipiko nga aprobado nga tambal alang sa Mpox. Mga pasyente kinahanglan og "supportive care and medications" aron mahupay ang kasakit ug kalintura.
Butyag niya nga kini makatabang sa mga pasyente nga makarekober, samtang kadtong dunay severe symptoms kinahanglan nga higpit ang pagmonitor sa healthcare professionals sa medical nga mga pasilidad.
Iyang gidasig ang publiko nga mobisita gilayon sa pinakaduol nga health center kung makasinati og bisan unsang sintomas sa Mpox, aron nga maatiman gilayon og sakto.
Gitambagan sa CHO ang publiko nga likayan ang "close and intimate, skin-to-skin contact"—sama sa paghilawas, paghalok, paggakos, ug pagpauraray—ngadto sa mga indibiduwal nga dunay posibleng kaso sa Mpox.
Kung ugaling di malikayan nga makaduol, sama sa mga caregivers, kinahanglan nga mogamit og Personal Protective Equipment (PPE).
Giawhag sab sa buhatan ang publiko nga mag-obserba sa "frequent and proper hand hygiene" gamit ang alcohol-based hand rub o pinaagi sa paghugawas og sabon ug tubig kung ang mga kamot kontaminado. Kadto sab nga mga ibabaw o mga lugar nga gisuspetsahan nga nakontamina sa kagaw o infected person kinahanglan nga maglimpyo ug mag-disinfect.
Ilang gidasig ang mga katawhan nga likayan ang pagkontak sa mga hayop, kay ang mga hayop mahimong magdala og kagaw, ilabi na kung masakiton o nakita gikan sa mga lugar nga dunay mga kaso sa Mpox.
Pipila ka mga sinyales ug sintomas sa Mpox sa hayop, naglakip sa mga binuhi, mao ang mga rashes, kalintura, ug di ganahan mokaon.
Matud sa DOH-Davao nga pipila ka mga komon nga sintomas sa Mpox sa tawo naglakip sa skin rashes o mucosal lesions nga molungtad hangtud upat ka semana. Ubang mga sintomas mao ang kalintura, sakit sa ulo, pagpanakit sa kaunoran, sakit sa likod, ubos og enerhiya, ug nihubag nga lymph nodes.
Gipahimug-atan sa departamento nga bisan kinsa matakdan sa Mpox, ug mahimong motakod kini pinaagi sa close contact uban ang nataptan nga tawo, o pinaagi sa paggamit sa ilang mga sinina o kutsara o plato.
Hinuon gitataw sa DOH-Davao nga ang kagaw mahimong mapakgang pinaagi sa paggamit og sabon ug tubig. Mga nataptan nga mga indibiduwal mahimong tambalan pinaagi sa "supportive care". Mga pasyente nga way laing mga sakit mahimong magpabilin sa panimalay human masusi, hangtud nga ang tanang kugang matanggal ug ang bag-ong ang laing sapaw sa panit mamugna, ang proseso nga molungtad og mga duha hangtud upat ka semana.
Sumala sa World Health Organization (WHO), Mpox mao ang makatakod nga sakit dala sa orthopoxvirus nga labing nailhan nga monkeypox virus. Dunay duha ka managlahi nga clades ang kagaw: Clade I (uban ang subclades Ia ug Ib) ug Clade II (uban ang subclades IIa ug IIb). (Rojean Grace G. Patumbon)