'Confidential funds' andam tubagon sa legal team ni VP Sara
GIPANIGURO ni Vice President Sara Duterte nga kung ang kaso iduso ngadto sa haum, iyang tim andam nga mo-esplikar sa isyu kabahin sa gialegar nga pagwaldas sa confidential funds.
“Nagbibigay kami ng saktong sagot at nagbibigay kami ng explanation ng mga accusations," pag-esplikar niya atol sa pakighinabi sa mga tigbalita sa Magsasay Park sa Davao City niadtong Lunes, Agosto 11, 2025.
Dugang ni Duterte nga dili kini entablado kon diin ang mga akusasyon gihimo "whenever and against whomever" nga gusto nila, diha kung gibati nila nga mag-akusa og tawo.
Gitin-aw sa Bise Presidente nga ang iyang tim nagklaro na nga kung ang articles of impeachment ang gipasaka batok kaniya, iyang defense team andam nang motubag ngadto sa tanang mga akusasyon nga gihatud sa prosecutors ug sa House of Representatives (HOR). Matud pa niya nga sa dihang ang kaso niabot sa Supreme Court (SC), ilang gisumite ang tanang gikinahanglan nga mga dokumento nga gipangayo sa taas nga hukmanan.
Kahinumdoman, gi-impeach sa HOR si Duterte niadtong Pebrero, nagpasaka og kaso sa Vice President uban ang graft, corruption, ug gialegar nga pagkalambigit sa planong pagpatay kang President Ferdinand “Bongbong” Marcos Jr.
Sayo niini, Hulyo 25, gibasura sa SC ang ikaupat nga impeachment batok kaniya. Apan niadtong Agosto 4, ang House of Representatives niduso og mosyon nga nihangyo sa SC subli ug ikonsidera ang ilang hukom nga nagbasura sa kaso.
Niadtong Agosto 6, 2025, ang Senado naghipos sa impeachment complaint subay sa bag-ohay lang desisyon sa SC.
Sa una pang pakighinabi, nanawagan si Duterte nga irespeto ang desisyon sa Senado nga hipuson ang impeachment articles. Iyang giangkon nga nga buot gyud niya og “bloodbath”—ang tibuok presentasyon sa mga ebidensiya sa matag habig aron nga makita sa publiko —apan iyang giangkon nga di na kini mahimong mahitabo human nga ang kaso gipadaplin na.
Samtang si Acting Davao City Mayor Sebastian “Baste” Duterte nagsulti nga sa pagsugod pa lang daan, ang impeachment complaint batok sa iyang igsuon, Sara, duna nay bulok politika. Iyang gidasonan ang sentimento ni Sara ug nagkanayon nga ang reklamo usa lang ka “smear campaign” batok sa Bise Presidente. (Rojean Grace G. Patumbon )