MIPAAMBIT og 576 sakong bugas si Davao City First Congressional District Representative Paolo "Pulong" Duterte ngadto sa 30 ka mga Muslim communities ubos sa iyang distrito atol sa pagsaulog sa Holy Month of Ramadan.
Ang ayuda gipadala ni Congressman Pulong pinaagi sa iyang anak nga si Rodrigo “Rigo” Duterte II niadtong Biyernes, Abril 5, 2024 diin kini mitunol sab og cash assistance.
Ang mga bugas ang ipang apod-apod sa anaa sa 1,000 ka mga miyembro sa tribong Tausog, Iranun, Maguindanao ug Maranao.
“Daghang salamat, Congressman Pulong. Amoa ning i-apud-apod sa 100 kapin ka pamilya nga among sakop aron ang tanan makakaon,” sumala ni Imam Jun-Jun Pandadagan sa San Rafael Mosque.
Samtang gipasalig nila ni Imam Noli Distansya sa Datu Loho Madrasato Al-Islamie ug Masjid Jamiun Nur’s Imam Ismael Tahir sa Bangkal nga tungaon ang mga ayuda ngadto sa tag 200 nila ka mga sakop aron nga tanan makakuha ug makakaon.
Sumala ni Imam Tahir nga sukad pa kaniadto pirming anaa ang suporta sa mga Duterte panahon sa Ramadan.
Una paman mibiya sa maong lugar si Rigo, gi-ampuan kini sa mga Imam dayun nagpasalamat sab ngadto kanila sa suporta nga gihatag sa pamilyang Duterte. (JPC/KAMM Media Network)