GOOD news alang sa mga edaran gumikan gisugdan na sa City Government of Davao pinaagi sa City Social Welfare and Development Office (CSWDO), ang house-to-house distribution sa cash incentives nga P100,000 alang sa mga centenarians sa siyudad niadtong Lunes, Oktubre 16.
Ang pagpanghatag og cash incentive distribution subay sa City Ordinance 0727-21 Series of 2021.
Tumong niini nga mahatagan og pasidungog ug pahalipay ang mga Davao centenarians.
Sa Davao City, adunay 25 ka mga Dabawenyo centenarians ang nakatakdang modawat og cash gikan Oktubre 16-24, 2023.
Alang sa usa ka 88-anyos nga taga Piapi Boulevard, Davao City manghinaut siya nga hatagan pa og dugang kinabuhi aron nga makaabot pa siya niini nga edad.
“Unta makaabot pa ko ani aron makahimulos ko sa ingon ani nga hinabang gikan sa gobyerno,” ingon ni Refuerdo Hellosana kinsa miingon nga sa iyang pangedaron, wala pa siya’y gibati sa panglawas.
Lahi sab ang panglantaw sa usa ka 76-anyos nga Dabawenyo, diin alang niya, dapat ubos pa niini ang edad sa makahimulos.
“Naa unsay 80-anyos, kay lisod na kaayo makaabot sa 100-anyos ang mga tawo karon labi na nakatilaw na ta sa pagkaon sa bag-o nga panahon nga daghan ang naga-imbento aron molami ang mga pagkaon, daghan na og chemical,” ingon ni Teodoro Marquez, nga taga Jacinto, Brgy. 32-D, Davao City.
Ang CSWDO magpadayon sa pagpangita og mga edaran nga mamahimong makadawat niini nga prebiliheyo gikan sa gobyerno.