DAVAO CITY -- Nanawagan ang Police Safety and Security Office (PSSO) ngadto sa mga Dabawenyos ug turista nga ipraktis ang “culture of security” sa Davao City atol sa usa ka bulan nga Kadayawan Festival aron magarantiya ang malinawon, malipayon, ug mauswagon nga selebrasyon.
Gipahimangnoan ni PSSO acting Operations and Coordination Officer Ret. Major Jose Daniel Kimpo ang matag usa pinaagi sa pulong nga “May nakita? Dapat magsalita!”, pasabot nga ang maigmaton nga publiko maoy kinahanglan isip opisyal nga "security measures".
“We would like to emphasize that the security culture will always be practiced. Pero (but) rest assured that the security and safety cluster will make sure that this month-long activity of the Kadayawan will be a very safe, prosperous, and happy celebration,” pasalig niya.
Aron nga mabantayan ang tanang mga lugar sa tibuok Agosto, ang safety and security cluster sa siyudad, nga naglangkob sa PSSO, Task Force Davao, Davao City Police Office (DCPO), ug uban pang mga kaubang ahensiya, magpakatag og gibanabana nga 14,000 security personnel. Sa bisan unsang adlaw, mga 600 uniformed officers ang ipakatag sa mga lugar nga dunay dagkong kalihukan, apil ang San Pedro Square ug Magsaysay Park, uban pa.
Giabisohan sab ni Kimpo ang mangadto sa pangilin nga ang backpacks, kalo, jackets, payong nga hait, ug mga non-transparent water bottles istriktong gidili sa mga lugar nga dunay kalingawan. Ipahimutang ang assistance and information desks sa matag event zone aron makatabang sa mga bisita nga motaho sa mga gidudahan nga butang o mga tawo.
Gitin-aw sab ni Kimpo nga ang alert level sa Davao City nagpabilin nga taas bisan pa "moderate rating" sa dakbayan.
“Sabi nga na Davao City is the second safest place in the Philippines but we cannot place our alert level lower. Ang ating safety and security cluster is always there, and we always make sure na all activities shall have a safe environment and the safety and security cluster will always be assigned in all activity areas.” tin-aw niya.
Ang kadawayan karong tuiga dunay tema nga “A Festival Rooted in Culture and Heritage,” opisyal nga ablihan sa Agosto 7 pinaagi sa Misa Pasasalamat ug molungtad hangtud Agosto 31, kon diin dunay Grand Kadayawan Weekend sa Agosto 15 hangtud 17. (PR)