GIAWHAG sa Ateneo de Davao University (Addu) ang Dabawenyos nga mosalmot sa ilang tinuig nga blood donation campaign, “Dugong Bughaw,” sa Sabado, Hulyo 26, 2025, sa SM City Davao.
Ang kalihukan nagtumong sa pagpakusog sa blood supply sa siyudad, nga nag-atubang kanunay og pagkuwang, ilabi na panahon sa dengue ug uban pang medikal nga emerhensiya.
Gitin-aw ni Mark Paul Samante, Chairperson of Ateneo de Davao University Community Engagement and Advocacy unit, nga sa niaging tuig nga duha ka aktibidad sa bloodletting -- nahitabo sa Hulyo ug Disyembre, nakatigum og 200 units sa dugo.
Karong Hulyo, nagtakda ang unibersidad og target nga 100 ka donors, uban ang ikaduhang aktibidad nga giplano sa Disyembre.
“Common ni siya nga problem naa gyuy shortage of experience of shortage [of blood], dili lang ni siya every season but throughout. Mao na nga we have the dugong bughaw bloodletting from the university para naa ta’y ma-contribute nga supply sa blood,” pagpasabot ni Samante.
Ang kampanya karong tuiga idumala sa SM City Davao.
Mga posibleng mga donors nag-edad og 18 ug pataas mahimong mo-rehistro og una pinaagi sa official Facebook page sa unibersidad.
Sa aktong adlaw, magpresentar sila og balido nga pagkailhanan ug magkompirma nga duna silay igong katulog.
Matud ni Samante nga tanang makolekta nga blood units itunol ngadto sa Philippine Red Cross alang sa distribusyon ngadto sa mga ospital ug klinika nga nagkinahanglan. (PIA)