Dakong sawa nalit-ag

COTABATO CITY -- Giluwas sa mga personahe sa Ministry of Environment Natural Resources and Energy (Menre) ang usa ka dakong sawa alas 3:00 sa hapon, Miyerkules, Mayo 7, 2025, sa Upi, Maguindanao del Norte Province.

Sigun sa taho sa Menre sa Bangsamoro Autonomous Region in Muslim Mindanao (BARMM) nga nakadawat sila og taho bahin sa dakong sawa nga nakasulod sa kulongan sa pato sa Barangay Borongotan, Upi.

Sumala pa nga gilit-ag sa tag-iya sa mga pato nga si Ado Guiamil ang dakong sawa nga Reticulated Python nga dunay gitas-on nga 8.4 ka tiil kon diin nakatukob na og duha ka mga pato.

Dali kining gitaho ni Guiamil ngadto sa MENRE-BARMM hinungdan nga nahiabot dayon ang mga sakop sa Biodeversity Ecosystems Research and Development Services (BERDS) sa City Environment and Natural Resources Office (Cenro).

Gitunol dayon ni Giuamil ang sawa ngadto kanila nga sa samang higayon gikalipay sab niya tungod kay wala gihimong pulutan sa mga molupyo ang bitin.

Nanawagan ang Menre-BARMM sa katawhan nga dili patyon ang makita nga sawa inay nga kontakon dayon ang mga awtoridad alang sa tukma nga aksiyon. (Edgar E. Fuerzas)