PATAY ang usa ka dalaga kinsa gisikwatan pud ang iyang cellphone ug kwarta sa mga kawatan alas 11 sa buntag sa Maguindanao del Sur, Huwebes, Abril 18, 2024.
Ang namatay mao si Aloha Sandigan nga molupyo sa Barangay Barungis, Ligawasan sa Special Geographic Area sa Bangsamoro Autonomous Region in Muslim Mindanao.
Samtang angol pud ang kauban niini nga nagmaneho og motor nga si Esmael Ebus nga taga Guindulungan, Maguindanao Del Sur.
Sa imbestigasyon, samtang angkas ang biktima sa motor ni Ebus ug nagbaybay sa Barangay Salbu, Datu Saudi Ampatuan, Maguindanao del Sur, kalit nga mibutho ang mga armadong lalaki dayon pusil kanila.
Una misibat ang mga suspek, gisikwat niini ang cellphone sa biktima lakip na iyang kwarta.
Si Sandigan natusaktusak sa lima ka samad-pinusilan, rason sa kamatayon, samtang si Ebus gitabang og gidala sa Maguindanao Provincial Hospital.
Nagpadayon ang imbestigasyon sa kaso samtang gisubay sa kapulisan ang lawom pa nga motibo sa pagpatay sa dalaga. (Edgardo E. Fuerzas)