KIDAPAWAN CITY -- Sa nagpadayong kainit sa temperatura karon, miabot na sa P650 milyon ang kantidad sa kadaut sa sektor sa agrikultura sa probinsiya sa Cotabato tungod sa El Niño phenomenon.
Sa report subay sa tigum sa Provincial Disaster Risk Reduction and Management Full Council (PDRRMC), P306 milyon natala ang damyos sa mga lungsod sa Arakan, Alamada, Aleosan, Kidapawan City, Magpet, ug Pigcawayan.
Gidoble niini ang datus gikan sa M'lang diin nakatala kini og P346 milyon nga kadaut sa pananom nga nakadeklarar usab og State of Calamity.
Gawas niini, gipailawom sab sa state of calamity ang mga lungsod sa Arakan, Alamada ug Aleosan.
Pipila sa labing apektadong pananom mao ang humay, mais ug utanon.
Ang Office of the Provincial Agriculture padayon nga naglihok aron matubag ang mga panginahanglanon sa mga apektadong mag-uuma, sama sa paghatag og tabang sa mga binhi ug paghimo og mga water pump nga magamit sa mga asosasyon sa mga mag-uuma. (Edgardo E. Fuerzas)