GITAHO sa Department of Transportation (DOTr) nga ang Davao Bus Project (DBP) gitakda nga magsugod sa pilot operations niini sa 2027.
Ang pilot route sa DBP maglangkob gikan Catalunan Pequeño ngadto Ulas, unya padulong sa Bangkal, magpadayon sa Matina, Bankerohan, Quirino, Bajada, Lanang, Buhangin, ug sa katapusan sa Sasa.
Gikanayon ni DOTr Secretary Vince Dizon, atol sa iyang pag-inspeksiyon sa construction site sa Calinan District, nga si President Ferdinand “Bongbong” Marcos Jr. nagmando kaniya nga paspasan ang proyekto.
“The President is really disappointed with the delays, kaya he instructed us to fast track this project. We need to stop making excuses and start solving problems, kasi game changer itong project na ito and it will be a model system for the entire country,” tug-an niya niadtong Hulyo 24, 2025.
Isip kabahin sa mga preparasyon alang sa pilot operation, gipahibalo ni Dizon nga ang pag-establisar sa Davao Bus Driving Academy, nga nagtumong sa paghimo og propesyonal sa pagmaneho og public transportation ug magseguro sa luwas nga kadalanan alang sa manakayan ug motorista.
“Tapos na ‘yung mga panahong atras-abante lang ang training ng mga driver natin. Kabilin-bilinan ng Pangulo, dapat lahat ng magmamaneho ng mga bus dito sa DavaoBus ay may sapat na training para masiguro ang kaligtasan ng mga pasahero, pati na mga motorista sa kalsada,” pagpasabot niya.
Kahinumdoman, gikompirma sa Department of Transportation-Project Office for Davao (DOTr-Davao) niadtong Enero 28, 2025, nga ang Bus Project padayong naglihok bisan pa sa walo ka bulan nga pagkadelatar. Giingong ang "funding is already secured", apan duna la'y pipila ka mga documentary requirements ang giproseso.
Ang proyekto mohatag og ekstensibo nga panagsumpay sa 29 ka mga ruta nga naglangkob sa 672 kilometros nga dalan, magkonektar sa mga nag-unang lugar sulod sa Davao City ug maglugway ngadto sa Panabo City. Mga 1,105 ka bus magdagan sa maong mga ruta, suportahan sa pagkonstrak og dugang pang 1,000 ka bus stops.
Unta ang bus project gilauman nga magsugod sa katapusan sa 2024 ug hingpit nang mapahimuslan karong 2025.