ANDAM na ang kapulisan sa Davao City Police Office (DCPO) alang sa Oplan Ligtas Undas karong Oktubre 31 hangtud Nobyembre 2, 2024.
Sigon sa DCPO prisohon ug kasohan ang mga molapas sa mga balaod nga ilang ipatuman.
Sumala ni DCPO spokesperson Police Captain Hazel Tuazon nga ilaha gayud nga prisohon ang mga masinupakon sa balaod apan nagtuo siya ang mga Dabawenyo disiplinado.
Nagpahinumdom ang DCPO nga dili magtagay og ilimnong makahubog sa sementeryo, bawal sab ang magdala og mga alak diin sa nasinatian sa ilang pag-inspeksiyon dunay mga alak nga gipangsulod sa mga sudlanan ug tubig.
Bawal sab ang mga canister, mga mahait nga butang ug mga sound speaker.
“Ginahangyo nato ang mga Dabawenyo nga dili lang ta magdala og dagko nga mga sound speaker, bawal ang loud music sa atong mg sementeryo, para mahatagan natog respito ang paghandom sa atong mga minahal sa kinabuhi nga nangamatay na,” ingon ni Capt. Tuazon sa pakighinabi sa SuperBalita Davao.
Daghan og gipangmuntar nga mga police assistance desks ang DCPO sa mga nag-unang sam-ang sa Davao City aron mahatagan og assistance ang mga tawo panahon sa Undas.
Gidugang ni Capt. Tuazon nga naa ang kooperasyon sa mga barangay alang sa paghatag sab og dugang puwersa sa pagbantay sa mga sementeryo. (Jeepy P. Compio)