GIABISOHAN ang mga molupyo sa Davao Region mga mangandam sa di masayrang panahon kay ang Intertropical Convergence Zone (ITCZ) padayon nga makaapekto sa habagatang Mindanao, sumala sa Philippine Atmospheric, Geophysical and Astronomical Services Administration (Pagasa).
Sa pinakauwahing weather bulletin nga gipagawas, Miyerkules, Hunyo 4, 2025, gikanayon sa Pagasa nga ang Davao Occidental, Davao del Sur, ug Davao Oriental makasinati og mapanganuron nga kalangitan uban ang katag-katag nga pag-ulan ug pagpanalugdog sa tibuok adlaw.
Kini nga kondisyon sa panahon tungod sa sa ITCZ nga moresulta sa pag-ulan.
Giawhag ang publiko nga magpabiling alerto, kay kasarangan ngadto sa mga kusog nga ulan usahay usahay hinungdan sa kalit nga pagbaha o mga pagdahili sa yuta, ilabi na sa mga flood-prone o kabukiran nga lugar.
Samtang ubang bahin sa habagatang Mindanao naglakip sa Zamboanga Peninsula, Soccsksargen, ug sa Bangsamoro Autonomous Region in Muslim Mindanao (Barmm) gilauman sab nga dunay susama niini nga kahimtang sa panahon.
Sa uban pang lugar sa nasud, ang Southwest Monsoon (Habagat) magdala og mapanganuron nga kalangitan uban ang katag-katag nga pag-ulan ug pagpanalugdog sa daghang mga lugar sa Luzon, apil ang Ilocos Region, Batanes, Babuyan Islands, Abra, Zambales, Bataan, ug Palawan.
Nagpasidaan ang Pagasa sa posibleng kalit nga pagbaha ug pagpangdahili sa yuta sa maong mga lugar tungod sa dugay pagbundak sa ulan.
Sa Metro Manila ug uban pang bahin sa Luzon, gilauman ang "partly cloudy to cloudy skies with isolated rain showers or thunderstorms. Localized thunderstorms may also lead to flash floods or landslides in susceptible areas."
Kasamtangan, ang Pagasa padayong nagmonitor sa kahimtang sa panahon ug nag-awhag sa publiko nga pabiling "informed" pinaagi sa ilang opisyal nga channels alang sa dugang katikaran. (David Ezra Francisquete)