APIL ang Davao Region nga naa sa ikalima nga luna sa nasud sa "adult overweight" ug "obesity rates," ikabalaka nga sinyales nga nag-usab ang estilo sa kinabuhi, hilig sa mga pagkaon, ug health gaps nga niapas sa mga molupyo.
Base sa surbey nga gihimo sa Department of Science and Technology–Food and Nutrition Research Institute (DOST-FNRI) niadtong 2018, 2019, ug 2021, 40.2 porsiyento sa mga hamtong nag-edad og 20 ug pataas sa Davao undanon o bug-at, hapit madoble sa 24 porsiyento nga natala sa 2003.
Kini nagbutang sa rehiyon uban ang Caraga (40.4 porsiyento), Central Luzon (40.4 porsiyento), Calabarzon (42.1 porsiyento), ug National Capital Region (46.5 porsiyento) isip maoy grabeng apektado nga mga lugar sa nasud.
Ang ihap gipaambit ni Retsebeth Laquihon, RND, sa National Nutrition Council–Davao Region atol sa hiniusang miting sa Regional Nutrition Media Group, Agosto 12, 2025, sa Ritz Hotel sa Garden Oases sa Bo. Obrero, Davao City.
Ang tigum nagdani sa mga kaubang tigbalita ug information officers gikan sa tibuok rehiyon aron nga hisgutan ang mga pamaagi sa pagpromotar sa mas himsog nga batasan pinaagi sa tukma ug napanahon nga impormasyon.
Hinuon ang suliran sa pagtambok sa Davao maingon nga naa lang sa mga hamtong, ang age-specific data sa FNRI nagtataw nga ang mga kabataan sa laing rehiyon nag-atubang og susamang hagit.
Sa National Capital Region, 6.4 porsiyento sa preschoolers nanambok, gisundan sa Calabarzon ug Cagayan Valley sa 5.0 porsiyento, taas sa national average nga 3.9 porsiyento.
Apil sa mga school-age children, ang national average naa sa 14 porsiyento, apan ang NCR maoy nanguna sa listahan uban ang 19.5 porsiyento, gisundan sa Calabarzon (18.7 porsiyento) ug Central Luzon (17.4 porsyento). Mga batan-on (nag-edad og 10–19) sa samang mga rehiyon nakatala sab og taas nga "overweight rates."
Bisan tuod kon ang Davao wala sa unang lima alang sa younger age groups, gitin-aw ni Laquihon nga ang overall trend tataw kaayo: daghang mga Pilipino, sa tanang edad, naglihok padulong sa di himsog nga weight ranges, nagpataas sa ilang risgo alang sa non-communicable diseases sama sa diabetes, hypertension, ug heart disease.
Nagpahimangno ang mga eksperto nga ang Pilipinas mag-atubang og “double burden of malnutrition”, kahimtang kon diin ang "obesity and undernutrition" mag-uban, kasagaran sa samang komunidad. Mga barangay sa kabukiran, di kaayo talagsaon nga makita ang ubos nga timbang sa bata sa usa ka pamilya ug ang taas og timbang nga hamtong sa sunod nga pamilya.
“This is not just a health problem; it’s also an economic problem,” pagtin-aw ni Laquihon.
Ang numero gikan sa Nutrition International nagpakita nga kung ang malnutrition sa tanan niyang porma di masusi, ang nasud mahimong mawad-an og $48 billion sa productivity sa 2030 tungod sa pagsumpo. Ang ubos nga birth weight lang mogasto og $1 billion matag tuig sa lost productivity, samtang sa di maayong praktis sa pagpasuso nitampo ngadto sa 5,000 pagkamatay sa bata ug 1,400 maternal deaths matag tuig.
Aron ibali ang maong urog, nag-implementar ang gobyerno sa Philippine Plan of Action for Nutrition (PPAN) 2023-2028. Ang six-year framework nagtumong sa pagpalambo sa food security, magseguro ang access sa nutritious food, ug maghatag og prayoridad sa bulnerableng mga grupo.
Naumol ubos sa National Nutrition Council, ang PPAN nagsuporta sa Marcos Jr. administration’s socioeconomic agenda, Philippine Development Plan 2023-2028, ug ang global commitments sama sa Sustainable Development Goals.
Giyahan kini sa mga prinsipyo "equity, sustainability, and community participation", ug magdasig sa mga pamilya nga mohimo og aktibo nga papel sa pagpalambo sa ilang kaugalingong nutrisyon.
Alang kang Laquihon, ang mensahe klaro kaayo: “We need to act now—not just as individuals, but as communities. The choices we make today about what we eat and how we live will shape the health of the next generation.” (David Ezra Francisquete)