NAGPAGAWAS og abiso ang Philippine Atmospheric, Geophysical and Astronomical Services Administration (Pagasa) Biyernes, Hunyo 6, 2025, nga nagpahimangno nga ang Mindanao ug uban pang bahin sa Davao Region makasinati og mga pag-ulan tungod sa "trough" sa low-pressure area (LPA) nga nahimutang sa 945 kilometros sa sidlakang bahin sa Eastern Visayas.
Ang LPA gilauman nga magdala og mapanganuron nga kalangitan uban ang katag-katag nga mga pag-ulan ug pagpanalugdog sa tibuok Bicol, Visayas, ug Mindanao. Nagpasidaan ang Pagasa sa kasarangan ngadto na sa kusog nga pagbundak sa ulan mohatud og kalit nga mga pagbaha ug pagdahili sa mga yuta, ilabi na gyud sa bulnerable nga mga dapit.
Samtang ang habagat magpadayon nga makaapekto sa uban pang bahin sa nasud. Mga rehiyon nga naglakip sa Metro Manila, Calabarzon, Mimaropa, Western Visayas, Negros Island Region, Zamboanga Peninsula, Bangsamoro Autonomous Region in Muslim Mindanao (Barmm), ug Soccsksargen makalaum og mapanganuron nga kalangitan uban ang katag-katag nga pag-ulan ug pagpanalugdog, nga sama og risgo sa mga pagbaha ug mga landslide.
Sa uban pang lugar sa Luzon, ilabi na sa sidlakang seksiyon, laing mga pag-ulan ug pagpanalugdog ang gilauman tungod sa nagpadayong habagat. Bisan tuod kung di gyud kusog, apan ang pagpanalugdog mahimong hinungdan sa pagbaha o landslide.
Kahimtang sa hangin sa tibuok nasud, magpabilin nga hinay ngadto sa kasarangan. Sidlakang seksiyon sa Southern Luzon ug Visayas makasinati og hangin gikan sa amihanang sidlakan, samtang ang uban pang lugar sa Luzon makalaum og hangin gikan sa habagatang kasadpan ngadto sa habagatan.
Magpadayon ang Pagasa sa pagmonitor sa LPA alang sa bisan unsang timailhan sa katikaran ngadto sa tropical cyclone ug mag-abiso sa publiko pabiling "updated" pinaagi sa official weather bulletins. (David Ezra Francisquete)