Davao Region ulanon tungod ni 'Aghon'

Davao Region ulanon tungod ni 'Aghon'
Pagasa

NAHIMO nang tropical depression ang low pressure area (LPA) sulod sa Philippine Area of Responsibility (PAR) nga tawgon og “Aghon”. Kini na ang unang bagyo nga nakasulod sa nasud sa 2024.

Sa 24-oras nga bulletin nga gipagawas sa Philippine Atmospheric, Geophysical, and Astronomical Services Administration (PAGASA), ang tropical storm nahimong bagyo sa alas 2:00 sa kaadlawon kagahapon, Biyernes, Mayo 24, 2024, nga unang nasiplatan duol sa habagatang-sidlakan sa Mindanao sa PAR sayo sa buntag niadtong Huwebes, Mayo 23.

Tungod niini, Davao Region makasinati gihapon og mapanganuron nga kalangitan uban ang katag-katag nga pag-ulan ug pagpanalugdog tungod kang "Aghon" nga posibleng makamugna og kalit nga pagbaha o pagdahili sa yuta mugna sa kasarangan ug usahay kusog nga bundak sa ulan.

Base sa datus, ang gipanglantawan sa state-weather bureau nga ang "Aghon" nga naa sa 220 kilometros sa sidlakan sa Surigao City, Surigao del Norte, molihok pakasadpan sa amihanang kasadpan sa gikusgon nga 10 km/h uban ang gibatonan nga hangin nga 45 km/h duol sa sentro ug paghuros hangtud sa 55 km/h.

Matud sa PAGASA nga daghang mga lugar sa tibuok nasud naa karon ubos sa Tropical Cyclone Wind Signal (TCWS) No 1.

Sa Luzon, ang TCWS No 1 gipataas sa Sorsogon, Albay (Manito, Legazpi City, City of Tabaco, Rapu-Rapu, Santo Domingo, Malilipot, Bacacay, Malinao, Tiwi), Catanduanes ug Camarines Sur (Caramoan, Garchitorena, Presentacion, Sagñay, San Jose, Lagonoy, Tigaon).

Samtang ang Visayas naglakip sa Eastern Samar, Samar, Northern Samar, Leyte (Babatngon, Tacloban City, Palo, Tanauan, Tolosa, Dulag, Mayorga, Macarthur, Abuyog, Javier) ug Southern Leyte (Silago, Hinunangan, Hinundayan, Anahawan, San Juan, Liloan, Saint Bernard, San Ricardo, Pintuyan, San Francisco).

Sa pikas bahin, ang Dinagat Islands, Surigao del Norte naglakip sa Siargao - Bucas Grande Group ug Surigao del Sur (Carrascal, Cantilan, Madrid, Carmen, Lanuza, Cortes, City of Tandag) sa Mindanao makasinati og samang signal.

Ang pinakataas nga posibleng signal sa hangin tungod sa Aghon gilauman nga naa sa Signal No. 2.

Gitagna nga ang Aghon molihok pa-amihanang kasadpan o amihanang-amihanang kasadpan "while slowly intensifying" sa Biyernes ug Sabado, Mayo 25.

Ang Dominggo, Mayo 26, ang Aghon mosugod na og "recurve" padulong sa amihanang sidlakan o amihanan-amihanang sidlakan sa Luzon “while starting to continuously intensify.”

Sa udto sa Dominggo, mas mokusog pa ang tropical storm, ug sa Martes, Mayo 28, mahimo na gyud nga bagyo. (David Ezra Francisquete)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph