GIKANAYON sa usa ka opisyal sa Local Government Unit (LGU) sa Davao nga ang solusyon sa naghuot nga trapiko sa Davao City mao ang Davao Bus Project, kanhi gitawag og High Priority Bus System (HPBS).
Gisulti ni Atty. Tristan Dwight Domingo, assistant city administrator ug project manager sa Davao Bus Project, nga bisan ang pagpalit sa napulo ka bag-ong yunit sa bus sa DCBus project sa siyudad, pabilin ang Bus Project nga long-term solution sa nasinating paghuot sa dakbayan.
“The only thing that we really believe could address the majority or 90 percent of our public transportation problem is if we can implement a bugger project which is the HPBS,” pagtin-aw niya atol sa ISpeak media forum, Huwebes, Abril 24, 2025, sa City Hall Training Hall.
Nagpadayag si Domingo og paglaum nga ang dakbayan makahimo sa pag-implementar sa Bus Project. Ang maong proyekto nipailawom na og daghang feasibility studies sukad 2011 ug usa sa dakong mga plano nga angay nga sagupon sa siyudad.
Iyang gipahimug-atan nga kung way saktong pagtuon o pagplano sa transportasyon, ang siyudad makasinati og daghang mga "inconveniences". Apan, kung ang proyekto malampusong maimplementar, makaayo kini ug magsilbi nga modelo sa ubang mga siyudad.
Kahinumdoman, gipahayag sa Department of Transportation – Project Office for Davao (DOTr-Davao) nga niadtong Enero 28, 2025, ang ang Bus Project naglihok pa apan nadelatar sulod sa walo ka bulan. Naa na ang pundo, apan duna pay ubang mga documentary requirements ang giproseso.
Gisulti sab ni DOTr Project Evaluation Officer Richard Villanueva nga ang pagkadelatar di malikayan sa usa ka komplikado nga proyekto sama niini. Esplikar niya nga daghang mga land areas kinahanglan nga makuha alang sa terminal, depots, ug bus stops.
Usa sa mga rason sa pagkadelatar mao ang uwahing pag-aproba gikan sa National Economic and Development Authority (NEDA) niadtong 2019. Kinahanglan pa sa ahensiya nga ma-"revalidate" ang feasibility study aron nga maseguro ang kamahinungdanon niini una ang pandemya.
Ang proyekto maglakip sa extensive network nga 29 ka ruta nga naglangkob sa 672 kilometros nga mga dalan, magkonektar sa nag-unang lugar sulod sa Davao City ug magpalapad ngadto sa Panabo City. Mga 1,105 ka bus ang mobiyahe niining maong mga ruta, kon diin kapin 1,000 bus stops ang tukuron.
Gilauman unta ang bus project nga magsugod sa operasyon sa katapusan sa 2024 ug hingpit nang "operational" sa 2025.
Samtang maghuwat sa hingpit nga implementasyon sa proyekto, ang dakbayan temporaryong naglunsad sa Peak Hours Augmentation Bus Service (PHABS) ug nagpalit og napulo ka yunit sa bus aron nga makatabang pagpakubos sa suliran sa trapiko alang sa mga pampublikong sumasakay. (Rojean Grace G. Patumbon)