GIPANGATARUNGAN sa Davao City Police Office (DCPO) nga ang gihimo sa pulis sa giingong pagpanakit sa babaye ug usa ka menor de edad sa Buhangin Police Station gitumong nga mapugngan ang kadaut ngadto sa mga tigsala, pulis, ug uban pa nga naa sa lugar.
"In light of their aggressive and disorderly conduct, which constituted clear violations of Disrespect and Disobedience to Persons in Authority, as well as Scandalous Acts, the police and auxiliary officers lawfully restrained the individuals," matud sa DCPO sa ilang pahayag, Martes, Abril 29, 2025.
Gitin-aw sa buhatan nga gihimo lang sa pulis ang maximum tolerance ug nituman sa mga sumbanan nga gitakda sa Philippine National Police Operational Procedures (PNP POP).
Matud sa DCPO nga ang duha ka mga indibiduwal gitunol sa mga tanod sa Barangay Communal niadtong Abril 27. Una sila gitunol, ang mga nahisgutan nalambigit matud pa sa komosyon samtang nagtagay kon diin gisumbag, gilaparo, ug gituok sa ama-ama sa usa ka menor de edad. Gisulti sab sa buhatan nga ang babayeng indibiduwal nakahiagom og angol sa nawong human nga gisuntok sa uyoan sa menor. Samtang ang menor nisulay sab og depensa sa iyang kauban nga niresulta hinuon sa pagdako sa sitwasiyon.
Sa dihang niabot sila sa istasyon sa pulis ug impluwensiyado na sa ilimnong makahubog, ang duha ka indibiduwal nagpakita matud pa og "violent and aggresive" nga lihok sa personahe sa sulod sa istasyon. Dugang gikanayon sa buhatan nga ang duruha giingong nanagsinggit ug gigubot ang mga tawo nga naa sa ilang palibot, ug pisikal nga giatake ug gilayog ang usa ka pulis ug sakop sa police auxiliary nga nagpugong kanila. Gikanayon nga ang duruha "verbally assaulted" sa pulis ug sa auxiliary nga naningkamot nga nag-alam-alam nila.
Kahinumdoman nga gikanayon sa Buhangin Police Station sa Facebook post nga ang duruha ka indibiduwal mag-atubang og kasong "direct assault and alarm and scandal". Sulti sa istasyon nga ang social media post mao ang "product of imagination invented to produce unreal, fabricated, and false allegation,a scenario hat never happened during the time aimed to tarnish the reputation of the Buhangin Police Station."
Giduso sa Buhangin Police Station ang mga kaso ngadto sa prosecutor's office. Mga kaso nga gipasaka mao ang "direct assault and alarm and scandal" niadtong Abril 28, 2025.
Apan sa Facebook post ni Adrelyn Amaquin, iyang giangkon nga ang duruha ka indibiduwal ang gipasakitan sa pulis atol sa ilang pag-adto sa Buhangin Police Station.
"Gepang badjakan ang duha ka bata, puwdi vah ne mga ma'am in sir, akong anak nga babae minor, palihog ko sa inyong tubag, unsay dapat Nako buhaton aning tawhana," pangutana niya.
Giklaro sa DCPO nga ang ilang buhatan komited sa pagdepender sa tawhanong katungod ug katungod sa mga suspek gitahod. Gipasabot sa buhatan nga nagpadayon ang internal investigation alang sa tibuok transparensiya ug pagpanubag sa hitabo.
Ila sab nga gipasidan-an ang publiko nga ihunong na ang pagpakatag og wala pa masusi nga impormasyon nga makamugna og kataranta ug di pagkasinabtanay. Pabilin ang ilang buhatan nga nagkomiter sa pagmentinar sa pagsalig ug kompiyansa sa komunidad pinaagi sa pagbuhat sa ilang tahas.
Pasabot sa buhatan nga importante kaayo alang sa publiko nga masunoron sa balaod ug irespeto ang balaod ug makig-alayon sa mga awtoridad isip esensiyal kaayo sa pagmentinar sa kahusay ug kalinaw sa komunidad. Matud pa nga pinaagi sa maangayon nga aktuwasiyon, katawhan malikay sa legal nga linugdangan nga makatampo sa luwas ug hapsay nga palibot. (Rojean Grace G. Patumbon)
