GIPAKLARO sa Davao City Police Office (DCPO) nga walay giingong nahitabo nga hostage luyo sa mga nagkatag sa komento sa mga netizens sa Facebook labot sa usa ka babaye nga gituok sa kauban niining pasahero sa dyip.
Ang insidente nahitabo alas 9:30 sa buntag, Lunes, Pebrero 10, 2025, sa National Highway atubangan sa Enrico Nograles National High School sa Barangay Bago Aplaya, Davao City.
Sumala ni DCPO spokesperson Police Captain Hazel Tuazon nga walay hostage-taking ang nahitabo, kon di bunga lang sa depresyon sa suspek nga si alyas Mark, 26-anyos, nagpuyo sa Talomo Centro, Barangay Talomo, Davao City.
Giingon ni Captain Tuazon nga bag-o lang suma pa namatay ang asawa sa suspek diin naa siya’y duha ka mga anak ug wala kini trabaho.
Una niini, nag-trending sa social media ang video nga na-post sa netizen nga si Diocelyn Jabillo diin makita nga giayo'g gunit sa lalaki ang liog sa babaye.
Perteng pangayo'g pakitabang sa pasahero nga babaye kinsa gidali sab og padagan sa drayber ang dyip padung sa Ulas area.
Pag-abot sa dapit gitabangan og kulata sa mga nag-istambay ang nasampit nga suspek ug dali sab nga giindorso sa kapulisan.
Ang biktima nga 19-anyos nga babaye kinsa padulong ra unta sa iyang trabaho, pursigido gayud nga mopasaka og reklamo batok sa suspek gumikan sa iyang gibati nga trauma sa hitabo.
Human sa hitabo, daling gipaklaro sa DCPO ang mga insidente sanglit gilayong nagkatag ang taho nga daw hostage-taking.
Dugang sa biktima nga una siya nakasakay sa dyip apan sa pagsakay sa suspek sa susamang dyip, sa way daghang istorya, kalit ra siya gituok niini.
Ang suspek gibalhog sa prisohan kinsa mag-atubang og kasong Physical Injury. (Jeepy P. Compio)