GITIN-AW ni Vice President Sara Duterte nga ang defense team ni kanhi President Rodrigo Duterte (FPRRD) wala niduol sa Australian government bahin sa iyang aplikasyon alang sa interim release.
“There is no application of President Duterte for interim release to Australia,” tug-an niya sa mga tigbalita niadtong Hunyo 27, 2025, sa Sanguniang Panlungsod.
Dugang pa niya nga ang defense team ni FPRRD nisubmiter og mga aplikasyon sa duha ka mga nasud, nga gitudlo sa dokumento. Bisan tuod kung gitantang, gibutyag niini nga way usa niini nga Australia.
Iyang gipadayag nga wala siya masayud nganong dunay email gikan sa indibiduwal sa Department of Foreign Affairs and Trade bahin sa interim release ni FPRRD. Sumala niya nga wala gyud kini mahisguti, ug way aplikasyon nga gisang-at ngadto sa Australian government. Iyang gipahimug-atan nga way intensiyon nga mo-aplay alang sa interim release.
Gisulti ni Sara nga wala siya masayud kung asa gi-adres ang email, apan nakakuha siya og kopya niini. Wala sab siya makahibawo kung unsay basehan tungod kay wala kini mahisguti sa legal team ni FPRRD ug sa Australian government.
Giasumer niini nga ang email gikan sa Australia tungod kay ang telephone number niini nagsugod sa +61. Subay sa country code, 61 nabutang sa Australia, ug ang website mao ang dfat.gov.ad.
“The Australian Government is aware that Former Philippines President Rodrigo Duterte has applied for interim release to a third unnamed country. Australia has not agreed to host Mr. Duterte if he is granted interim release nor are we considering this,” pahayag sa email nga gibasa ni Sara.
Gibutyag sa Vice President nga dunay gihisgutan nga listahan sa mga nasud nga gikonsidera sa defense team ni FPRRD, ug ang Australia usa sa mga opsiyon. Apan iyang giklaro nga ang defense team wala ni-aplay sa bisan unsa nga nasud sa listahan.
Sayop matud pa ang pag-asumer nga dunay gihimong aplikasyon ngadto sa mga nasud nga apil sa listahan. Sa dihang nibisita sab siya sa Australia, wala siya makig-istorya sa bisan kinsa nga mga opisyal sa gobyerno niini.
Si Nicholas Kaufman, abogado ni FPRRD, nipetsiyon alang sa interim release sa potential host countries alang sa kanhi presidente, nagtumbok sa iyang pangedaron ug siya "has not pose a flight risk".
Kahinumdoman, si FPRRD gihatud sa The Hague sa Netherlands alang sa iyang gialegar nga crimes against humanity atol sa iyang war on drugs campaign samtang naa pa sa katungdanan. (Rojean Grace G. Patumbon)