GIKANAYON ni Vice President Sara Duterte nga ang Department of the Interior and Local Government (DILG) "should act professionally" human sa gihulagway niya nga “insensitive” sa ilang paagi sa pagpahibalo sa pagsuspende sa klase sa pipila ka bahin sa nasud tungod sa kusog nga ulan.
“They have to be professional. Hindi ko sinasabing hindi -- hindi pwede maging professional ang ano ha pero the person can express, has the freedom of expression. An institution does not have the freedom of expression,” matud niya atol sa paghinabi sa mga tigbalita niadtong Hulyo 22, 2025, sa The Hague sa Netherlands.
Esplikar ni Duterte nga sama kaniya, kinahanglan nga ang DILG malahi tali sa personal ug opisyal nga communication channels.
Iyang gitumbok nga duna siyay personal nga account nga lahi sa Office of the Vice President (OVP).
Dugang pa niya nga ang OVP nagtudlo og tigpamaba aron sa pagpasabot sa trabaho, proyekto, ug mga serbisyo sa institusyon sa propesyonal nga paagi.
Sayo niini, wala malipay ang netizens bahin sa ilang nabasa nga “unserious” posts sa DILG nga nagpakita og "meme-like tone" sa pagpahibalo sa pagsuspende sa klase ug trabaho.
Gihimo ang post sa daghang mga lugar sa Luzon, ilabi na sa Metro Manila, nga nakasinati og kusog nga pag-ulan ug pagbaha.
“Mga Abangers, Lousy kami sa gobyerno kahapon. Dapat kagabi pa lang, inunahan na namin ang delubyo,” mabasa sa post sa DILG.
Mga inila nga sila Jake Ejercito ug Jessy Mendiola nagpadayag sab sa ilang gibati bahin sa tonada sa departamento sa paghimo og sama niini nga pagpahibalo.
“There’s a time and place for trying to be funny– this isn’t one of them,” matud ni Ejercito.
“Is this supposed to be funny?” pangutana ni Mendiola.
Samtang sa pakighinabi uban ang dzMM kagahapon, Hulyo 23, 2025, esplikar ni DILG Secretary Jonvic Remulla nga kini na ang iyang estilo sa pag-post, bisan kadtong panahon pa niya isip gobernador sa Cavite.
Naglaum siya nga ang publiko makasabot sa iyang paagi ug nagpahimug-at nga di niya tuyo nga magpakaulaw sa bisan kinsa.
Matud niya nga kung nakapasakit siya, nangayo siya og pasaylo. Apan dugang pa niya nga di niya usbon kung kinsa siya ug magpadayon "doing his best" ilabi na sa pagpakatag og importante nga impormasyon. (Rojean Grace G. Patumbon)