TULO ka mga sakyanan ang nalambigit sa disgrasya sa Carlos P. Garcia Highway, duol sa NHA Village, Buhangin, Davao City alas 10 sa gabii, Hunyo 25, 2025.
Sumala sa report sa Buhangin Police Station, nasayran nga nalambigit nga mga sakyanan mao ang Suzuki F110 nga motorsiklo dunay plate number 8978YT nga gidrayban ni Jiricho Martinez Basilio, 23-anyos, estudyante, taga Purok 13-A Bugac, Ma-a, Davao City; Fuso cargo truck dunay plate number MAE-5025 nga gidrayban ni Allan Felisilda Charcos, 51-anyos, taga 1189 Zapanta St., Malate, Manila; ug ang Isuzu aluminum wing van truck dunay plate number CBN-9664) nga gidrayban ni Raf Patindol Dominguez, 37-anyos, taga Purok Seaside, Brgy. Pag-Asa, Kalamansig, Sultan Kudarat.
Sumala sa imbestigasyon nga ang tanang sakyanan padulong sa norte nga bahin partikular sa Panacan gikan sa C.P Garcia Highway.
Ang motorsiklo ug cargo truck anaa sa tunga nga lane, samtang ang wing van anaa sa kilid nga lane.
Sa pag-abot sa intersection sa NHA Village Road, ang motorsiklo ug ang cargo truck mihunong aron pasagdan ang laing sakyanan nga moliko sa wala, apan, ang Isuzu wala makakita nga nihunong ang mga sakyanan sa unahan busa naigo sa likod sa cargo truck.
Tungod sa kusog nga impak, ang cargo truck nisulod sa unahan ug nakaigo sa motorsiklo.
Usa ka helper sa wing van nga si Bernan Lucero, 37-anyos, nasamdan ug dali dayong gidala sa Southern Philippines Medical Center (SPMC) sa mga responders sa Central 911.
Ang drayber sa wing van ug ang iyang sakyanan gidala sa Buhangin Police Station alang sa dugang pagsukit-sukit.
Gipahinumdoman sa kapulisan ang mga drayber nga mo-distansiya ug magbantay pag-ayo, ilabi na sa mga intersection ug mga dapit diin naay trapik.
Gihikay na ang kasong Reckless Imprudence Resulting in Physical Injury and Damage to Property batok sa drayber nga gikustodiya karon sa Buhangin PNP. (Glae Ann T. Richardson, SPAMAST Intern)