GIPAHAYAG sa Department of Public Works and Highways–Davao Region (DPWH-Davao) nga ang karatula nga nagbalandra sa pagkadelatar sa konstraksiyon sa Maa Flyover tungod matud pa sa rason nga politikal usa ka “false and misleading.”
“The claim that the project is being delayed due to alleged political issues involving the current administration is false and misleading,” pagtin-aw sa DPWH-Davao nga nasulat sa ilang pahayag niadtong Agosto 2, 2025.
Giesplikar sa buhatan nga ang pagkadelatar tungod sa mga isyu sa Road Right-of-Way (RROW) nga naglambigit sa pipila ka nahabiling propedad. Kasagaran niini nga mga isyu giingong naresolba na, samtang dunay pipila na lang ang nakaung-ong tungod kay gikinahanglan pa ang "settlement funds."
Gitaho sa DPWH-nga ang upat ka mga propedad nga gitumbok alang sa dinalian nga "acquisition" ang kasamtangan nang giproseso. Ang "acquisition" nalangay og dugay tungod sa "mortgage issues" sa maapektuhan nga bahin sa luna, hinungdan nga ang buhatan nakig-koordinar na uban ang mortgage banks.
Bahin sa "utility-related concerns", gisulti sa DPWH-Davao nga ila nang gipahibalo ang Davao Light and Power Company (Davao Light) bahin sa pagbalhin sa mga poste sa kuryente sa bahin sa Monteritz, nga gitakda kagahapon, Agosto 3. Padayon sab ang pagpakig-koordinar uban sa telecommunications companies ug ang buhatan naghuwat sa ilang tubag bahin sa pagtangtang ug pagbalhin sa apektado nga mga poste.
Gitin-aw sa DPWH-Davao nga ang proyekto hingpit nang napundohan sukad pa 2022, ug ang pundo gikinahanglan alang sa iyang komplesyon ang napagawas na. Padayon pa sab ang "civil works" ug kasamtangan nga naa na sa 82.5 percent completion.
“We assure the public that the Maa-Magtuod Flyover Projects remains a priority, and the Office continues to work toward its completion,”pasalig sa DPWH-Davao.
Ang ahensiya nag-awhag sab sa publiko nga magpabilin nga mainampingon batok sa pagpakatag og "misinformation" ug nagdasig sa matag usa nga mosalig lang sa opisyal nga tinubdan sa katikaran sa mga proyekto nga gipatuman sa ilang buhatan.
Kahinumdoman nga gisulti ni DPWH-Davao spokesperson Dean Ortiz atol sa media forum niadtong Nobyembre 27, 2024, nga ang Maa Flyover gilauman nga matapos sa uwahing bahin sa 2026 o sayo sa 2027. Apan dunay porsiyon sa proyekto nakasinati og pagkalangay tungod sa padayong mga isyu sa RROW. (Rojean Grace G.Patumbon)
