NIHANGYO si Konsehala Jessica Bonguyan sa Davao City nga ang Department of Public Works and Highways (DPWH) ug ang project contractors imbitahan ngadto sa sesyon sa Konseho aron nga makahatag og katikaran sa Ma-a Flyover.
“The goal is not to assign blame, but to ensure better coordination, regular public updates, and the swift, safe completion of a project that directly impacts thousands of life,” matud niya atol sa privilege speech niadtong Martes, Agosto 6, 2025, sa Sangguniang Panlungsod.
Si Bonguyan, kinsa maoy tsirman sa Committee on Public Works and Highways, nagsulti nga pormal niyang giimbitahan ang DPWH, project contractors, ug uban pang nalambigit nga mga ahensiya sa sunod nga regular session nga gitakda sa Agosto 12, 2025.
Iyang gipahimug-atan nga ang Dabawenyos "deserve clear roads and clear answers," ug ang gobyerno kinahanglan nga magdemonstrar og pagpaminaw.
Nagpadayag sab ang konsehala og mga kabalaka bahin sa "bumper-to-bumper traffic congestion" nga hagbay nang nasinatian sa molupyo sa Ma-a, ug nagtin-aw nga kini maoy hinungdan sa pagkadelatar sa mga tawo nga padulong sa trabaho, eskuwelahan, ug uban pang importanteng mga tuyo.
Iyang gitumbok nga ang proyekto orihinal nga gitumong sa pagtabang sa paghapsay sa paghuot sa trapiko sa siyudad nahimo na karon nga “source of daily stress for our community.”
Gitin-aw ni Bonguyan nga ang pagkadismaya sa publiko niabot na sa “boiling point” sa dihang karatula gipabarog sa construction site nga nag-angkon nga ang pagkadelatar tungod sa administrasyon ni Marcos ug Romualdez.
Isip tubag, nagpagawas ang DPWH-Davao og pahayag ug nagkanayon nga ang karatula nga nagbasol sa hinungdang politikal sa pagkadelatar “false and misleading.”
Gi-esplikar sa ahensiya nga ang pagkadelatar tungod mismo sa mga isyu sa Road Right-of-Way (RROW) nga naglambigit sa pipila ka nahabiling propedad ug uban pang mga gamit.
Kasagaran niining mga isyuha ang naresolba, samtang ang uban nakaung-ong pa tungod kay kinahanglan pa og "settlement funds."
Apan gitin-aw ni Bonguyan nga ang karatula nagpakita nga gikapoy na kaayo ang publiko ug wala nay pagsalig sa pag-uswag sa proyekto. Dugang pa niya nga mga tawo gikapoy na sa paghuot sa trapiko ug ang pagpaabot og dugay sa pagtapos sa proyekto.
Apan iyang giila ang pahayag bag-ohay lang sa DPWH nga nagkompirma nga ang proyekto nga hingpit nang gipundohan ug kasamtangang naa na sa 82.5 porsiyento nga pagkahuman. Gitumbok sa ahensiya ang nagpadayong mga isyu sa RROW ug pagbalhin sa mga poste nga maoy nagpabiling mga hagit.
Nagpadayag siya og pasalamat ngadto sa paghatag og katin-awan sa DPWH ug nagtin-aw sa “critical need for clear communication on public projects.”
Kahinumdoman nga gipaambit ni DPWH-Davao spokesperson Dean Ortiz atol sa media forum niadtong Nobyembre 27, 2024, nga ang Maa Flyover gilauman nga mahuman sa uwahing bahin sa 2026 o sayo sa 2027.
Apan dunay mga porsiyon sa proyekto nakasinati og pagkadelatar tungod sa nagpadayong mga isyu sa RROW. (Rojean Grace G. Patumbon)