Drayber gipadad-an og 'show cause order'

LUYO sa garbo sa Davao City nga anaa sa ikaduhang puwesto sa mga pinakaluwas nga siyudad sa Pilipinas alang sa 2025, sumala sa World Travel Index (WTI), naa gihapoy bulayagon nga taxi drayber, apan maihap ra ug dili gayud tanan.

Kini human nga nag-trending sa social media ang post sa usa ka anak dihang giingong nailad ang iyang mga ginikanan sa usa ka drayber sa taxi sa pagpaningil sa kantidad og P3,000 nga plite gikan Davao International Airport (DIA) padung sa Ecoland Terminal.

Tungod niini, daling niaksiyon ang Land Transportation Franchising and Regulatory Board (LTFRB) Davao Region uban sa koordinasyon sa lokal nga kagamhanan ning siyudad.

Adlaw’ng Lunes, Hulyo 7, 2025, nailhan sa LTFRB-11 ang taksi drayber nga gireklamo tungod sa overcharging sa iyang pasahero sa nakalabay nga semana.

Subay sa pakighinabi sa GMA Super Radyo Davao kang Nonito Llanos III, Regional Director sa LTFRB-11, nga gipadad-an na nila og show cause order ang operator sa maong taxi ug gihatagan og tulo ka adlaw aron nga mopakita ang drayber alang sa imbestigasyon.

Nagdasig si Llanos nga gilayong mosumbong sa ilang buhatan pinaagi sa mga hotline numbers nga gihatag sa mga personahe sa LGU-Davao sa waiting area sa taxi sa arrival gate sa DIA.

Kahinumdoman nga nisakay ang mga nireklamo gikan sa airport padulong Davao City Overland Transport Terminal (DCOTT), kinsa usa kanila person with disability (PWD).

Nasayran nga nisakay sila gikan sa drop off point, inay sa regular taxi lane ug wala mahatagan og complaint stub alang sa paspas unta nga pag-ila sa unit sa taxi.

Subay sa kuha sa closed-circuit television (CCTV) camera, nailhan ang taxi unit ug desidido karon nga moreklamo ang nasampit nga mga pasahero.

Duha ka mga taksi drayber ang nahinabi sa SuperBalita Davao diin sumala nila daan na kining ginahimo sa pipila ka mga boluyagon nga mga drayber sa taksi.

“Daghan man na diha, mag-depende lang og i-reklamo sila sa pasahero ug dili, kay kung dili, so makalusot sila, ug maanad, pero’g maatlan pud og moreklamo ang pasahero, mamingaw na nga ilegal nga aktibidad nila, mobalik na pud mga usa ka bulan,” pagpadayag sa usa ka drayber sa taksi nga regular nga nagaturno sa DIA.

Giingon sab sa usa ka drayber nga si alyas Henry, napulo katuig na siyang drayber og taksi, diin kini nga estilo sukad pa kini niadto.

“Dili na na bag-o diri sa airport, paatik-atik lang og hazard human nilang baba sa pasahero, sugaton dayon ang moagi nga pasahero paggawas sa arrival gate. Naa sab mang-recruit sa una, mosugat sa gate, tapos og layo gani, hanyagan og presyo sa pakyaw, ang luoy lang kay tigbason gyud ang pasahero og sobra kaayo ang presyo,” pagbulgar sa usa ka drayber.

Tungod niini, mas giistrikto na karon ang linya sa mga taksi ug usa ra ang dapit nga sakyan sa mga pasahero.

Dako sab ang natabang sa mga personahe sa LGU-Davao nga nagahatag og complaint stub alang sa paspas nga pag-ila sa unit sa taxi ugaling dunay mga reklamo. (Jeepy P. Compio)