KASONG pagsupak sa Republic Act (RA) 11313 kon Anti Bastos law, Unjust Vexation ug Physical Injury ang atubangon sa lalaki nga nag-viral sa Facebook dihang alegasyon nga gilingla niini ang babaye nga siya namasada og habal-habal nga motorsiklo.
Nasayran nga saysay sa biktima nga si alyas Sheena, 19-anyos misakay siya sa Panacan ug magpahatod unta sa Jerome, Agdao apan gituyok-tuyok siya sa drayber didto sa Buhangin area.
Dihang nahibulong kini nga kalit nisimang sa dalan ang iyang gisakyan, naka hunahuna kini sa pag Facebook live ug nakuhaan sa video ang plate number sa motor nga iyang gisakyan.
Pag-abot sa Buhangin area, nakahigayon ang biktima sa paglukso sa motor aron makaikyas hinungdan nga nakaangkon kini og samad sa iyang kalawasan, suma sa report sa PS5.
Sa gihimong follow up operation sa PS1 ug PS5 nadakpan ang suspek kinsa miangkon sa iyang nahimo.
Gilayon sab siya nga narespondehan pinaagi sa tabang sa pipila ka netizens kinsa nakakita sa maong FB live.
Depensa sa suspek, wala siya’y intensyon, apan dako ang pagtuo sa awtoridad nga dunay dakong dautang plano ang suspetsado.
Sumala ni Police Lieutenant Colonel Ronald Lao, ang station commander sa PS1 nga nasikop nila ang suspek bunga sa ilang makuti nga follow up operation uban sa Buhangin PNP sa panguna sa station commander Police Major Joenel Pederio.
Kasamtangang gibalhog ang suspek sa selda sa Buhangin PNP.