BOLUNTARYO nga nisurender ang drayber sa closed van nga nakabangga patay sa duha ka magtutudlo ug usa ka estudyante alas 9:53 sa gabii, Biyernes, Oktubre 25, 2024, sa Tupi, South Cotabato.
Ang aksidente nahitabo human nga gisungag sa van ang gisakyan sa mga biktim nga motorsiklo hinungdan sa ilang kamatayon.
Giila ang drayber sa van nga si Anthony Teloren kinsa giingong posibleng mag-atubang og kasong reckless imprudence resulting to multiple homicide ngadto sa korte.
Mga magtutudlo nga namatay giila nga sila Rezile Joy Pareñas, 28-anyos, Glykiel Jade Bico, 27-anyos, samtang ang estudyante mao si Jonaira Ambaco, 24-anyos, sa South East Asian Institute of Technology (SEAIT) sa Tupi, ug pulos molupyo sa Koronadal City.
Matud ni Municipal Disaster Risk Reduction and Management Office (MDRRMO-Tupi) Officer Emil Sumagaysay nga sakay ang mga biktima sa motorsiklo nga gimaneho ni Pareñas sa national highway sa Barangay Crossing Rubber, Tupi, South Cotabato.
Apan kalit lang gibanggaan sa kasugat niini nga Toyota Hilux closed van.
Tungod sa kakusog sa impak sa bangga, nangalagpot ang mga biktima sa ilang gisakyan nga motorsiklo.
Gidala ang mga biktima sa balay tambalanan apan gideklara sa doktor nga dead on arrival human makaangkon og grabeng mga bali ug samad sa mga lawas.
Gikanayon sa mga naka-saksi sa hitabo nga kusog kaayo ang dagan sa van nga nag-overtake sa laing sakyanan ug gisungag ang kasugat nga motorsiklo. (Edgar E. Fuerzas)